კვლევებით დადგენილია, რომ ალუმინი უარყოფითად მოქმედებს ნივთიერებათა ცვლაზე, ნერვული სისტემის მუშაობაზე და უჯრედების ზრდაზე. ზოგიერთი კვლევის თანახმად, სწორედ ალუმინის ზემოქმედებას უკავშირებენ ტვინის დაზიანებას, რომელიც ალცჰეიმერის დაავადებას ახასიათებს (პაციენტების თმაში ალუმინის მაღალი შემცველობა აღინიშნება).
ოდესღაც, დაბალი თვითღირებულების გამო, ალუმინის ჭურჭელს დიდი რაოდენობით აწარმოებდნენ. მას შემდეგ, რაც მეცნიერებმა ადამიანის ორგანიზმზე ალუმინის ნეგატიური ზემოქმედების შესახებ შეიტყვეს, ბევრმა ქვეყანამ ასეთი ჭურჭლის წარმოებაზე უარი თქვა.
ჭურჭლის სერტიფიცირებაზე მომუშავე სპეციალისტები გვირჩევენ, რომ ალუმინის ჭურჭელი მხოლოდ წყლის ასადუღებლად გამოვიყენოთ, რადგან მაღალ ტემპერატურაზე ყველა დანარჩენი ნივთიერება ალუმინის ჭურჭელში აქტიურ რეაქციებს იწვევს. ამ მიზეზის გამო, რუსეთის საბავშვო ბაღებში ალუმინის ჭურჭლის გამოყენება აკრძალულია.
მწარმოებლები ალუმინთან დაკავშირებული პრობლემების მოგვარებას ნაწილობრივ მასალის დამუშავებით ახერხებენ. ალუმინს ისეთი მეთოდით ამუშავებენ, რომ საკვებთან კონტაქტის დროს ქიმიური რეაქცია არ გამოიწვიოს.
რაც შეეხება ალუმინის ფოლგაში მომზადებულ საკვებს, ფოლგა მხოლოდ ერთჯერადი გამოყენებისთვის არის გამიზნული, ჩვენ კი გამოყენების წინ მისი ინერტული ფენით დაფარვის საშუალება არ გვაქვს. ალუმინის ფოლგაში მომზადებული საკვები შეიძლება მსოფლიო ჯანდაცვის ორგანიზაციის მიერ დადგენილ უსაფრთხო ნორმაზე ექვსჯერ მეტ ალუმინს შეიცავდეს.
განსაკუთრებით საშიშია ფოლგის კონტაქტი ცხელ კერძებთან, ამიტომ უკეთესი იქნება, თუ ცხობის დროს, ჩვეულებრივ საცხობ ქაღალდს, ე.წ. პერგამენტს გამოიყენებთ.
ბუნებრივია, ალუმინის მოხმარებიდან მთლიანად ამოღება შეუძლებელია, თუმცა მისი ოდენობის მინიმუმამდე შემცირება შეიძლება, ამისთვის კი რამდენიმე წესის დაცვა მოგიწევთ:
1. ნუ იყიდით და მოიხმართ ალუმინის ტარაში ან შეფუთვაში მოთავსებულ პროდუქციას (კონსერვებს, ნახევარფაბრიკატებს, მზა საკვებს და ა.შ.)
2. ნუ გამოიყენებთ ალუმინის ჭურჭელს.
3. და ყველაზე მთავარი - ნუ გამოიყენებთ ალუმინის ფოლგას კერძის მოსამზადებლად.
