ლეღვის ჯემი შეიცავს დიდი რაოდენობით რკინას და შეუცვლელი პროდუქტია ანემიის დროს.
კალიუმის შემცველობით ლეღვი მხოლოდ ბერძნულ კაკალს ჩამოუვარდება. შესაბამისად, რეკომენდებულია გულ-სისხლძარღვთა დაავადებების დროს.
ლეღვის ჯემი ამცირებს სისხლში ქოლესტერინის დონეს, მაგრამ არ არის რეკომენდებული დიაბეტის და სიმსუქნის დროს. ლეღვის მურაბა სიცხის დამწევ და ძალების აღმდგენ საშუალებად მიიჩნევა.
ჩვენ შემოგთავაზებთ ლეღვის უგემრიელეს სასუსნავებს, რომელთა მომზადება დამწყებ დიასახლისებსაც კი არ გაგიჭირდებათ.
ლეღვის ტრიუფელი „სამოთხის ცდუნება“
ლეღვი რამდენიმე წუთით ჩაუშვით მდუღარე წყალში. შემდეგ ამოიღეთ და გაშრობა აცადეთ.
ამასობაში, წყლის აბაზანაზე ან მიკროტალღურ ღუმელში გაადნეთ შავი შოკოლადი.
ლეღვის ყუნწის საპირისპირო მხარე ჯვარედინად ჩაჭერით და ამოავსეთ მსხვილად გატარებული ან გახეხილი ნიგვზით.
მიეცით ტრიუფელის ფორმა და ყუნწით ჩაუშვით გამდნარ შოკოლადში.
შოკოლადიდან ამოღების შემდეგ ლეღვები გასაშრობად დააწყვეთ.
როგორც კი შეამჩნევთ, რომ შოკოლადმა გამაგრება დაიწყო, კაკაოში ან დაჭრილ ნიგოზში ამოავლეთ. გამზადებული ტრიუფელები რამდენიმე საათით მაცივარში შეალაგეთ.
გემრიელი დესერტი მზად არის.
ლეღვის მურაბა თხილით
100 გრამი პროდუქტი შეიცავს: 2,98% ცილებს, 2,98% ცხიმებს, 92,22% ნახშირწყლებს.
ინგრედიენტები:
2,5 კგ. ლეღვი
2.3 კგ შაქარი
300 გრ. თხილი.
ლეღვი დაალაგეთ თუშფალანგზე, გადაავლეთ წყალი და აცადეთ, სანამ გაშრება.
შემდეგ გადაიტანეთ ქვაბში, დააყარეთ შაქარი და ამ მდგომარეობაში გააჩერეთ ერთი დღე, რათა წვენი გამოუვიდეს.
ამის შემდეგ დაადგით ზომიერ ცეცხლზე. როგორც კი წამოდუღდება, ცეცხლს დაუწიეთ, ქაფი მოაცალეთ და, დაახლოებით, 40 წუთი ხარშეთ.
მურაბა ცეცხლიდან გადმოდგით და კიდევ ერთი დღე გააჩერეთ.
მეორე დღეს ისევ დადგით ცეცხლზე და ისევ 40 წუთი ადუღეთ.
წინასწარ გასტერილებულ და გამშრალებულ ქილებში ჩაყარეთ მოხალული თხილი და ცხელი მურაბით შეავსეთ. ქილები მოხუფეთ, გადმოაბრუნეთ და გააცივეთ.
გამზადებული მურაბა გრილ ადგილას შეინახეთ.
ლეღვის ჯემი კონიაკით
ინგრედიენტები:
400 გრ ლეღვი
120 გრ შაქარი
1 ცალი ლიმონი
მწიკვი მარილი
1 სუფრის კოვზი კონიაკი ან რომი.
მომზადების წესი:
გარეცხილი, გაუფცქვნელი ლეღვი დაჭერით შუაზე ან ოთხ ნაწილად და ჩაყარეთ ქვაბში.
დააყარეთ გახეხილი ლიმონი, შაქარი, მარილი და კონიაკი.
ამ მდგომარეობაში დატოვეთ რამდენიმე საათით და პერიოდულად მოურიეთ.
ამის შემდეგ დადგით დაბალ ცეცხლზე და ადუღეთ, დაახლოებით, 30-40 წუთი.
თან პერიოდულად ხის კოვზით ურიეთ.
როგორც კი შეატყობთ, რომ ჯემი მზადაა, ქვაბი გადმოდგით ცეცხლიდან და ცხელი ჯემი ქილებში გადაიტანეთ.