როდის და როგორ დავთესოთ სააღდგომო ჯეჯილი?

ჯეჯილისთვის ნებისმიერი ფორმისა და ზომის ჭურჭელი გამოდგება. ხორბლის რაოდენობა და ჭურჭლის ფორმა კი  დიასახლისის გემოვნებასა და ფანტაზიაზეა დამოკიდებული. 

ხორბლის მარცვალი სწრაფად რომ გაღივდეს და კარგად გაიზარდოს, უნდა გარეცხოთ, ოდნავ შემთბარი წყალი დაასხათ და მთელი ღამე გააჩეროთ.
დილას წყალი გადაღვარეთ, ხორბალი გარეცხეთ და მინის ქილაში გადაიტანეთ. ქილას თავი დააფარეთ და ხორბალი 24 საათის განმავლობაში დატოვეთ. მომდევნო დღეს ქილიდან ამოიღეთ, წყალი გადაავლეთ და დასათესად მზადაა.

ჭურჭელში, რომელშიც ხორბლის დათესვას აპირებთ. 4-5 სანტიმეტრის სისქეზე ჩააფინეთ ბამბა ან ჩაყარეთ სუფთა მიწა.
„ნიადაგი“ თბილი წყლით დანამეთ და ზემოდან, 1 სანტიმეტრის სისქეზე, ხორბალი მოაბნიეთ.
ლანგარი თბილ და ნათელ ადგილზე დადგით, რომ მარცვლები სწრაფად გაღივდეს და გაიზარდოს. „ნიადაგი“ რომ არ გამოშრეს, არ დაგავიწყდეთ, დილა-საღამოს პულვერიზატორით დანამოთ.
დაახლოებით, ერთ კვირაში თქვენი ჯეჯილი ულამაზესი სანახავი იქნება. ზოგიერთი დიასახლისი, სათბურის ეფექტისთვის, ხორბლიან ჭურჭელს ცელოფანს აფარებს. უფრო კრეატიულები კი ჯეჯილისთვის განსაკუთრებულ ჭურჭელს არჩევენ. წარმოიდგინეთ, რომ ამ  ფუნქციას მშვენივრად ითავსებს ჩვეულებრივი კვერცხის ნაჭუჭი. სასაცილო ნახატებით გაფორმებული, „ქოჩრიანი“ კვერცხები განსაკუთრებით ბავშვებს მოსწონთ, ამიტომ შეგიძლიათ, საქმიანობას მათთან ერთად შეუდგეთ.

კვერცხის ნაჭუჭში ჯეჯილის გაზრდის ორი ვარიანტი არსებობს:
1) ჯეჯილის ნაჭუჭში გაზრდა: 
ამისთვის, კვერცხს თავი ფრთხილად გაუტეხეთ და შიგთავსი გადმოღვარეთ. ნაჭუჭები კარგად გარეცხეთ და გააშრეთ. შემდეგ, ფერადი ფლომასტერებით დაახატეთ სასაცილო სახეები და ჯეჯილის დასათესად მოამზადეთ. თითოეულ ნაჭუჭში ჩააფინეთ ცოტაოდენი სველი ბამბა და მოაყარეთ ხორბლის მარცვლები. ნაჭუჭები რომ არ დაიმტვრეს, კვერცხის კონტეინერში ჩააწყვეთ და თბილ ადგილას დადგით. როგორც ლანგარზე დათესილი ჯეჯილის შემთხვევაში. აქაც საჭიროა დილა-საღამოს წყლის შესხურება, რომ ბამბა არ გამოშრეს.

2) გაზრდილი ჯეჯილის ნაჭუჭში გადატანა:  
ლანგარზე გაზრდილ ჯეჯილს ჩამოაჭერით კუთხე და წინასწარ გამზადებულ ნაჭუჭებში ჩადეთ. ბავშვები ინტერესით ადევნებენ თვალს, როგორ დღითი დღე იზრდება მწვანე ჯეჯილი, ამიტომ მიეცით საშუალება თქვენს პატარას, საქმიანობაში თავადაც ჩაერთოს - ჩააფინოს ბამბა ჭურჭელში, დანამოს და ა.შ.

სხვათა შორის, კვერცხის ნაჭუჭებით შეგიძლიათ სააღდგომო სუფრისთვის დეკორატიული სანთლებიც გააკეთოთ. ამისთვის წინასწარ გამზადებულ ნაჭუჭებში გამდნარი პარაფინი უნდა ჩაასხათ და დაგრეხილი ბამბის ძაფი ჩააყოლოთ.

სააღდგომო დეკორაციები შეგიძლიათ, გააკეთოთ დეკორატიული კვერცხებისგან, ქსოვილისგან, ბისერისგან, ქაღალდისგან და ა.შ. ყველაფერი თქვენს ფანტაზიაზე და მარჯვე ხელებზეა დამოკიდებული.

მომავალ კვირას გასწავლით როგორ უნდა გააკეთოთ შოკოლადის კვერცხები, კვერცხის ფორმის ნამცხვრები და როგორ გააფორმოთ სააღდგომო სუფრა.

დიასახლისებო, მოგვწერეთ თქვენი საინტერესო იდეების შესახებ, გაუზიარეთ გამოცდილება დამწყებ დიასახლისებს.