სტუდია „ქაითი“ ახორციელებს თბილ და გადამდებ სოციალურ პროექტს „აჩუქე შეხება“ - „gift your touch“, რომლის მონაწილეები თავშესაფრებში მყოფი მოხუცები და ბავშვები არიან, მიზანი კი - მათი სურვილების ასრულებაა.
- ქალბატონო ხათუნა, უმეტესად რა სურვილები აქვთ პროექტის მონაწილეებს?
- როდესაც „კათარზისის“ მოხუცთა თავშესაფარს ვესტუმრეთ და ვთხოვეთ, თავიანთი სანუკვარი სურვილები გაემხილათ, დიდი მოულოდნელობა აღმოჩნდა ის, რომ თითოეული მათგანის სურვილი არა ძვირად ღირებული მაცივარი, ტელევიზორი ან მედიკამენტები, არამედ საყვარელი ადამიანების ნახვა და მათი შეხება იყო. ეს, ერთი შეხედვით, რთულად ასასრულებელი სურვილები გახლდათ. იგივე სიტუაცია დაგვხვდა თავშესაფრებში, რომლებიც სათითაოდ შემოვიარეთ. ზოგმა შვიდი წლის მონატრებულ შვილიშვილთან ჩახუტება ისურვა, ზოგს 30 წლის წინანდელი ოქროსუბნელი მეზობლის ნახვა უნდოდა. და დავიწყეთ ფიქრი, როგორ შეგვესრულებინა მათი სურვილები და გადავწყვიტეთ, რომ, მოხუცების გარდა, ჩვენი აქციის გმირები გამხდარიყვნენ შშმ პირები და თუნდაც ჩვეულებრივი ადამიანები, რომლებიც ბევრი მიზეზების გამო ვერ ახერხებდნენ ახლობლებისა თუ ნათესავების მონახულებას. სტუდია „ქაითის“ ამ სიურპრიზს სულ მალე ერთ-ერთ სატელევიზიო შოუში იხილავთ.
- რა გამოხმაურება მოჰყვა პროექტს?
- ჩვენი გამოფენის სენსიტიურმა იდეამ დიდი გამოხმაურება ჰპოვა უცხოელ პროფესიონალ ფოტოგრაფებში, ჩემს კოლეგებსა თუ, უბრალოდ, ფოტომოყვარულებში, რომლებმაც უკვე გამოაგზავნეს საკუთარი ნამუშევრები და ჩვენი სტუდია ბარსელონასა და ათენის ხელოვნების საერთაშორისო ბაზრობებზეც მიიწვიეს. აზერბაიჯანელი რეჟისორებისა და ფოტოგრაფებისგან მივიღეთ წინადადება, პროექტის ფარგლებში ერთობლივი ფოტოგამოფენა მოგვეწყო. პირველი გამოფენა ჩატარდება თბილისში, ცნობილი ქართველი და აზერბაიჯანელი ფოტოგრაფების მონაწილეობით. გამოფენის დროს მოეწყობა საქველმოქმედო პერფორმანსი მოხუცთა თავშესაფრის რამდენიმე მოხუცისთვის. მეორე გამოფენა უკვე ბაქოში გაიმართება.
როგორც გაირკვა, ასეთ ერთობლივ ფოტოგამოფენას რეგიონში პრეცედენტი არ ჰქონია. სითბო და სიყვარული, მართლაც, გადამდებია.
პროექტის მეორე ეტაპზე კი ვგეგმავთ, ქართულ-აზერბაიჯანული ერთობლივი გამოფენით უკვე ათენის ხელოვნების ბაზრობაზე წარვდგეთ.
გამოფენა გაშუქდება როგორც ქართულ, ისე აზერბაიჯანულ მედიაში. მომზადდება სიუჟეტები საიტებისთვის BBC.ru და abcNEWS, რომლის აზერბაიჯანელი ჟურნალისტი ჩვენი გამოფენის ერთ-ერთი ორგანიზატორია.
მინდა, სიამოვნებით აღვნიშნო, რომ ჩვენს გამოფენაში Funtime-ის ნიჭიერი ფოტოგრაფი ალექსანდრე სხულუხიაც მონაწილეობს.
- სამომავლოდ რა გეგმები აქვს სტუდია „ქაითის“?
- კიდევ ერთი სიახლე, რასაც სტუდია „ქაითი“ ექსკლუზიურად Funtime-თვის აანონსებს, გახლავთ ის, რომ ევროინტეგრაციის თემასთან დაკავშირებით, ზაფხულის დასაწყისში ვგეგმავთ გამოფენას სლოგანით - „ევროპა მიდის ძველ ევროპაში“, რომელშიც უკვე ევროპელი ფოტოგრაფები მიიღებენ მონაწილეობას.