აღდგომის დღესასწაული ლანჩხუთის და ჩოხატაურის მაჟორიტარმა, ტრადიციულად, მშობლიურ გურიაში აღნიშნა

საკნატუნო ამბები

18 აპრილი 17:42
90

ნინო წილოსანმა სადღესასწაულო დღეები მთლიანად თავის მოსახლეობასთან გაატარა. დეპუტატი რამდენიმე სოფელში ოჯახებს პირადად ესტუმრა და სადღესასწაულოდ, სხვადასხვა პროდუქტთან ერთად, ერკეთის დედათა მონასტერში სპეციალურად დამზადებული პასკები და იქვე შეღებილი სააღდგომო კვერცხები გადასცა.

ნინო წილოსანი ლანჩხუთში, ფეხბურთში საქართველოს ქალთა ეროვნულ ჩემპიონატსაც დაესწრო. დეპუტატმა ქალთა ს/კ ,,ლანჩხუთის" წევრები, „სარბიელთან“ ერთად, სახელობითი მაისურებით დაასაჩუქრა. მაჟორიტარისგან დაპირებული საჩუქრები მიიღეს ლესის მცირე საოჯახო ბავშვთა სახლის „იმედის სხივის“ აღსაზრდელებმა და მაჩხვარეთის ბიბლიოთეკამ.
საეკლესიო და საოჯახო რიტუალების შემდეგ დღესასწაულმა სოფელ შუხუთის ცენტრში გადაინაცვლა, სადაც ყოველ წელს აღდგომის დღესასწაულზე ლელო ბურთი იმართება. წელს ლანჩხუთის და ჩოხატაურის მაჟორიტარის ნინო წილოსანის ინიციატივით და მხარდაჭერით, ლანჩუთის გამგეობასთან ერთად ღონისძიებებს უფრო მასშტაბური და სახალხო სახე მიეცა.

შუხუთის ცენტრში მთელი დღის განმავლობაში პარალელურად მიმდინარეობდა სხვადახვა აქტივობა: ფეხბურთი, ჭადრაკი, ნარდი, მკლავჭიდი, ბაგირის გადაქაჩვა. ნინო წილოსანი, ცენტრში შეკრებილ მოსახლეობასთან ერთად, ყველა ამ ღონისძიებას დაესწრო. დაათვალიერა ლელოს სამუზეუმო ექსპონატები, ასევე სამხატვრო სკოლისა და ხალხური რეწვის ოსტატთა ნამუშევრების გამოფენა-გაყიდვა, დახლებზე გამოტანილი ადგილობრივი წარმოების პროდუქტები.

მთელი დღის განმავლობაში სტუმრების განწყობაზე ადგილობრივი ფოლკლორული ანსამბლებიც ზრუნავდნენ, რომლებიც ტრადიციულ გურულ სიმღერებს ასრულებდნენ. ნინო წილოსანმა, გამგებელთან და ეროვნული ბიბლიოთეკის დირექტორ გიორგი კეკელიძესთან ერთად, შუხუთის სკოლის ეზოში სკვერის ბიბლიოთეკა გახსნა, საიდანაც ყველას შეეძლება წიგნის წამოღება და დაბრუნება, და ასევე ახალი წიგნებით შევსება.

დეპუტატმა საპატიო ლანჩხუთელებიც დააჯილდოვა. ასევე დაჯილდოვდნენ სპორტსმენებიც. ღონისძიებები კი ლელო ბურთმა დაასრულა. ტრადიციული თამაში წელს ზემო შუხუთმა მოიგო.
„საოცარი დღეა. ყველას კარგი განწყობა აქვს და ერთმანეთს გადავცემთ ამ სიხარულს. მიხარია, რომ ამ ყველაფრის მონაწილე ვარ. აღდგომა და ლელო აქ განუყოფელია, ვგეგმავთ, რომ მომავალში ეს დღე უფრო მასშტაბურ სახეს მიიღებს და ადგილობრივ მნიშვნელობას გასცდება. დღესაც დავინახე რამდენიმე ტურისტი, და მინდა, რომ უფრო მეტმა გაიგოს ამ ტრადიციის და საერთოდ, გურიის შესახებ. გარდა ამისა, ჩვენ დღეს გავხსენით სკვერის სამკითხველო. მას ლელოს ბურთის ფორმა აქვს და ამით ორმაგი დატვირთვა ენიჭება:
ეს არის ერთგვარი სიმბოლო ამ სოფლისა და ამასთან მოსწავლეებს, ახალგაზრდებს ახსენებს, რომ წიგნის კითხვაც ისეთივე დიდი აზარტია, როგორც ეს სახალხო თამაში. ზემო შუხუთელებს ვულოცავ წლევანდელ გამარჯვებას. გურიას და მთელ საქართველოს კიდევ ერთხელ ვულოცავ აღდგომის ბრწყინვალე დღესასწაულს,“ - აღნიშნა ნინო წილოსანმა.