პარიზის მაღალი მოდის კვირეულში ან საფრანგეთში მიმდინარე ფოტოსესიებში მონაწილეობისთვის მოდელებს სამედიცინო ცნობა დასჭირდებათ, რომელიც დაამტკიცებს, რომ პაციენტი წონის სერიოზულ დეფიციტს არ განიცდის.
ფრანგი დამსაქმებლები, რომლებიც სამუშაოდ ნორმაზე გაცილებით დაბალი წონის მქონე მოდელებს აიყვანენ, სოლიდური თანხით - 75 ათასი ევროთი დაჯარიმდებიან და ეს ყველაფერი როდია, გარდა ჯარიმისა, დამსაქმებელს 6-თვიანი პატიმრობა ემუქრება.
გარდა ამისა, ოქტომბრიდან, რეკლამაში გასული მოდელის დამუშავებულ ფოტოებს აუცილებლად უნდა დაემატოს სპეციალური ნიშანი. ამგვარად საფრანგეთის ჯანდაცვის სამინისტრო ცდილობს, შეაჩეროს სილამაზის გავრცელებული იდეალი და შეამციროს ანორექსიით დაავადებულთა რიცხვი.
