ამის შესახებ "ჯორჯიან ეარვეისის" გენერალურმა დირექტორმა გივი დავითაშვილმა დღეს გამართულ პრეს–კონფერენციაზე განაცხადა.
"მინდა გითხრათ სასიამოვნო სიახლეების შესახებ, რომლებიც ბოლო პერიოდში"ჯორჯიან ეარვეისში" ხორციელდება. კერძოდ, ავიაკომპანია განვითარების ახალ ეტაპზე საჰაერო ფლოტის ძირეულ განახლებას გეგმავს. სულ რამოდენიმე დღეში ახალი ბოინგ 737-700 ტიპის საჰაერო ხომალდს დავარეგისტრირებთ, ასევე ემბრაერის ტიპის 2 თვითმფრინავი გვეყოლება", - აღნიშნა "ჯორჯიან ეარვეისის" გენერალურმა დირექტორმა.
დავითაშვილმა აღნიშნა, რომ სიახლეები ავიარეისების კუთხითაც იგეგმება. კერძოდ, 20 მაისიდან პირდაპირი რეისების შესრულება, როგორც თბილისიდან ლონდონის, ასევე სხვა ქვეყნების მიმართულებით.
"20 მაისიდან ვიწყებთ პირდაპირი რეისების შესრულებას თბილისიდან ლონდონის მიმართულებით, ფრენები შესრულდება კვირაში ორჯერ - ორშაბათსა და შაბათს. ასევე, 12 ივნისიდან ვიწყებთ პრაღის მიმართულებით პირდაპირი ფერენების შესრულებას - ყოველ ორშაბათსა და შაბათს. მიმდინარე წლის აპრილის ბოლოდან დავიწყეთ პირდაპირი ფრენები კიევის მიმართულებით, რომელიც ხორციელდება ყოველდღიურად. ასევე, ყაზანის მიმართულებით 2 ივნისიდან ფრენებს კვირაში 2 სიხშირით ვამატებთ. ასევე მგზავრთა მოთხოვნის საფუზველზე დაგეგმილი გვაქვს პარიზის მიმართულებით ავიარეისების დადგენა, რომელიც კვირაში ორი სიხშირით შესრულდება", - განაცხადა დავითაშვილმა.
ავიაკომპანია "ჯორჯიან ეარვეისი" 1993 წლის სექტემბერში დაარსდა, მაგრამ მას იმ დროს ავიაკომპანია "აირზენად" მოიხსენიებდნენ. 2004 წელს აგვისტოში, ავიაკომპანიამ სახელწოდება "ჯორჯიან ეარვეის"-ით შეცვალა, თუმცა, "აირზენა" ჯერ კიდევ ფართოდ გამოიყენება, როგორც საფირმო ბრენდი.
თავდაპირველად ავიაკომპანია ახორციელებდა ჩარტერულ რეისებს არაბთა გაერთიანებული საამიროებში, იტალიაში, ჩინეთში, ეგვიპტეში, ინდოეთში, სირიაში და ასევე რეგულარულ რეისებს ავსტრიასა და ვენაში.
1999 წელს "ჯორჯიან ეარვეისი" საქართველოს ფლაგმანური ავიაგადამზიდველი გახდა.
2000 წლის პირველ ნახევარში, ავიაკომპანიის ხელმძღვანელობამ მიიღო გადაწყვეტილება ავიაპარკის განახლების შესახებ და ლიზინგით აიღო კომპანია "Hapag-Lloyd" -გან ორი BOEING 737-500 ტიპის თვითმფრინავი. ეს იყო პირველი შემთხვევა, როდესაც ქართულმა ავიაკომპანიამ დასავლური წარმოების საჰაერო ხომალდების ექსპლუატაცია დაიწყო. მას შემდეგ "აირზენა" მუდმივად ზრუნავს ავიაპარკის განვითარებაზე და განახლებაზე.
