5 მცენარე, რომელიც ბინაში ჯანსაღ გარემოს შეგიქმნით

ბამბუკის პალმა (ლათ. Chamaedorea) - ხამედორეა ნელა მზარდი მცენარეა, მისი სიმაღლე 3 მეტრს არასდროს აღემატება და წლის ნებისმიერ დროს ულამაზესი სანახავია, თუმცა მისი მთავარი ღირებულება ის არის, რომ შესანიშნავად ფილტრავს ჰაერს ბენზოლისა და ტრიქლორეთილისგან.

სპატიფილუმი (ლათ. Spathiphyllum) -  მცენარეს წვეტიანი ფოთლები და თეთრი, მოყვითალო ან მომწვანო ფერის, თითისტარის ფორმის,  ხორკლებით დაფარული ყვავილედი აქვს, რომელსაც გარშემო აფრის ფორმის ყვავილსაფარი ეხვევა. მისი სიმაღლე 25 სმ-დან 1,5 მეტრამდეა. სპატიფილუმი საუკეთესოდ ებრძვის ნესტს, წმენდს ჰაერს ფორმალდეჰიდისა და ტრიქლორეთილისგან.

აგლაონემა (ლათ. Aglaonema) - მცენარე ეფექტურად ასუფთავებს ოთახის ჰაერს მომწამვლელი მინარევებისგან, მათ შორის - ავეჯის, პლასტიკატისა და საღებავებისგან გამოყოფილი ნივთიერებებისგან. აგლაონემა, ასევე, ანადგურებს სტრეპტოკოკურ ინფექციას, რომელიც, როგორც მოგეხსენებათ, არაერთ დაავადებას იწვევს.

ალოე ვერა - განსაკუთრებული თვისებების მქონე ძალიან ამტანი და სიცოცხლისუნარიანი სუკულენტი მცენარეა. სამკურნალო თვისებების გამო, „სიცოცხლის ელექსირსაც“ უწოდებენ და შეიძლება მისი როგორც გარეგანი, ისე შინაგანი გამოყენება, თუმცა, ამასთანავე, ალოე მავნე მინარევებისა და ტოქსინებისგან ჰაერის ფილტრაციასაც მშვენივრად ახერხებს.

კაუჩუკის ფიკუსი (ლათ. Ficus elastica) - ამ ლამაზ მცენარეს ძლიერი „ხასიათიც“ აქვს და შეუძლია, სინათლის დეფიციტისა და დაბალი ტემპერატურის პირობებშიც იცოცხლოს. ის, გარდა იმისა, რომ საუკეთესოდ მოქმედებს ადამიანის განწყობაზე, ოთახში ჰაერის გასუფთავებასაც ბრწყინვალედ უმკლავდება - კერძოდ კი, კანცეროგენურ ნივთიერებას ფორმალდეჰიდს, რომელიც უხვად არის სრულიად ჩვეულებრივ ნივთებში - დაწყებული კოსმეტიკიდან, დამთავრებული კბილის პასტით და დაპრესილი ხისგან დამზადებულ ნაკეთობებში.