რაღა თქმა უნდა, ბევრს უნახავს მომავალი iPhone 8-ის ჩანახატები და ფოტოებიც კი, ასე რომ, მასზე გარკვეული წარმოდგენა უკვე შეგვექმნა.
და მაინც, როგორც ჩანს, „რვიანის“ ეკრანი ისეთივე უჩარჩოო იქნება, როგორიც Samsung-ს აქვს. Home ღილაკი გაქრება და ზემოთ მხოლოდ ვიწრო ზოლი იქნება კამერის, დინამიკებისა და გადამწოდებისთვის.
ეკრანის გვერდზე ფიჭური ქსელის დონის, აკუმულატორის მუხტის დონისა და უსადენო ქსელებთან მიერთების ინდიკატორები განთავსდება. სხვა ინფორმაციის ადგილი აღარ დარჩა. ასე რომ, სტატუსის სტრიქონს მისი ჩვეული სახით ვეღარ ნახავთ.
უკანა პანელზე ორმაგი კამერის ვერტიკალური მოდული განთავსდება.
აი, თითის ანაბეჭდის სკანერის ადგილმდებარეობა ჯერ ბოლომდე გარკვეული არაა. ფოტოების მიხედვით თუ ვიმსჯელებთ, მას ან უშუალოდ ეკრანში ჩაამონტაჟებენ, ანდა საერთოდ გააუქმებენ.
მოარული ხმების მიხედვით, Apple „რვიანში“, თითის ანაბეჭდების სკანერის ნაცვლად, სახის ამომცნობ სისტემას გამოიყენებს. თუმცა იმასაც ამბობენ, რომ მომავალ „აიფონში“ უკანა პანელზე თითის ანაბეჭდის სკანერის ნახვრეტი მოჩანს - ზუსტად ისეთი, როგორიც Samsung Galaxy S8-ზე.
ჰო, მართლა, ნეტა ლითონის კორპუსში უსადენო დამუხტვის სისტემა როგორ იმუშავებს?
მოკლედ, iPhone 8-ის ყველა საიდუმლო ჯერ კიდევ არაა ამოხსნილი. უცნობია, მიიღებს თუ არა Lightning-ის კონექტორის ნაცვლად 24 კონტაქტიან USB-C.
„რვიანის“ პრეზენტაცია სექტემბერში უნდა გაიმართოს, ბაზარზე კი, ალბათ, წლის ბოლოს გამოჩნდება - როგორც ინსაიდერები ამბობენ, Apple წარმოების გამართვას ვერ ასწრებს.
