დღეისთვის ავტომობილების უმრავლესობას ორი სატერფული აქვს, მათ შორის 1000-ცხენისძალიან ჰიპერკარებსაც კი! ეს სავსებით მისაღებია, ვინაიდან სიჩქარეთა ავტომატური კოლოფი ადამიანზე უფრო სწრაფად მოქმედებს და ექსპლუატაციის დროსაც გაცილებით მოსახერხებელია.
თავის დროზე სიჩქარეთა ავტომატური კოლოფის გამოგონებამ მძღოლის ფეხებთან მესამე სატერფული გააქრო, ახლა კი Nissan მეორე სატერფულის გაქრობასაც აპირებს. ის, უბრალოდ, საჭირო აღარ იქნება, ვინაიდან ელექტროკარი Leaf აჩქარებასაც და დამუხრუჭებასაც ერთი - გაზის სატერფულით შეძლებს.
იდეა თავისთავად ძალიან მარტივია: სისტემა სახელად e-Pedal ავტომობილის ერთი სატერფულით მართვის საშუალებას იძლევა. გაზის სატერფულზე ფეხის დაჭერით ავტომობილი აჩქარდება, ხოლო ფეხის აღებით დამუხრუჭდება.
თუკი ფეხს გაზის სატერფულიდან საერთოდ ავიღებთ, Leaf-ის მუხრუჭი მთელი ძალით ამუშავდება და ავტომობილი გაჩერდება.
Nissan-ში გვიმტკიცებენ, რომ e-Pedal ელექტროკარს ნებისმიერი საგზაო პირობების დროს გააჩერებს - მაშინაც კი, თუკი ავტომობილი დაღმართზე იდგება.
უჩვეულოა? აბა, რა, მაგრამ მიჩვევა შეიძლება. მანამდე კი Nissan Leaf-ში მუხრუჭის სატერფულს ყოველი შემთხვევისთვის ტოვებენ - როგორც იაპონელები აღნიშნავენ, „აგრესიული დამუხრუჭებისთვის“.
სისტემა e-Pedal მანქანის დაქოქვისას გათიშულია და მისი გააქტიურება ცენტრალური კონსოლიდან ღილაკზე თითის დაჭერით შეიძლება.