ბეჭედი ცერზე
ცერა თითი მარსის თითია. ცერზე ბეჭედს, მით უფრო მამაკაცის ცერზე, დიდი მნიშვნელობა აქვს. მარსის თითზე ბეჭდის მფლობელი, როგორც წესი, ენერგიული, ემოციური და ექსპანსიური ადამიანია. ისინი პირდაპირები, ჯიუტები, მეომარი, დრო და დრო ფიცხები და აგრესიულები არიან.
ბეჭედი საჩვენებელ თითზე
საჩვენებელი თითი იუპიტერის თითია. ამ თითზე გაკეთებულ ბეჭედს „ძალაუფლების“ ბეჭედს უწოდებენ. ამ თითზე ბეჭდის ტარებას ასტროლოგები და ქირომანტები მორიდებულ და მორცხვ ადამიანებს ურჩევენ. ის მათ იუპიტერის ძალით აავსებს, უფრო თავდაჯერებულებს გახდის და თვითშეფასებასაც აუმაღლებს. ამას გარდა, ცხოვრებაში წარმატებას მოუტანს და ბედს სწევს. ენერგეტიკის კუთხით საჩვენებელ თითზე განსაკუთრებით სასურველია ოქროს ანდა კალის ბეჭდების ტარება.
ბეჭედი შუა თითზე
შუა თითი სატურნის თითია. შუა თითს ბეჭდით თავმოყვარე, თავიანთ უპირატესობაში დარწმუნებული ადამიანები იმკობენ. რაც უფრო მასიურია ბეჭედი და თვალი, მით უფრო მკვეთრად აქვს ადამიანს ეს თვისებები გამოხატული. სატურნის თითზე საგვარეულო სამკაულების გაკეთებაც მიღებულია, რომელიც წინაპრებთან კავშირს, კარმის რწმენას, ბედის გავლენასა და უმაღლეს დანიშნულებას გამოსახავს. შუა თითზე საგვარეულო ბეჭედი ბედის უარყოფითი გავლენის დაძლევაში დაგეხმარებათ და დაბრკოლებების გადალახვას შეგაძლებინებთ.
ბეჭედი არათითზე
არათითი მზის თითია. ბეჭედი მარჯვენა ხელის არათითზე (კათოლიკეებში - მარცხენაზე), პირველ რიგში, დაოჯახების ნიშანია. საქორწილო ბეჭდის გარდა, სხვა ბეჭდის ქონა არათითზე მისი მფლობელის ხელოვნების, ფუფუნებისა და გემოვნების მიმართ დამოკიდებულების მაჩვენებელია. როგორც წესი, მას მსახიობები, მხატვრები, ესთეტები და საერთოდ, შემოქმედებითი პროფესიის ხალხი ატარებს. მზის თითზე ბეჭდის ტარება ადამიანის გართობისა და დროსტარებისკენ მიდრეკილების მაჩვენებელია.
ბეჭედი ნეკზე
ნეკი მერკურის თითია. მერკური დიპლომატების, ბიზნესმენების, ორატორების, ექიმებისა და პოლიტიკოსების მფარველია. ამიტომაც ნეკზე ბეჭედი ეხმარება იმათ, ვისაც მარჯვე ხელი, მოქნილი ჭკუა და მჭევრმეტყველება ესაჭიროება. მერკურის თითზე ბეჭედი თავის მფლობელს ნებისმიერ ადამიანთან ურთიერთობის დამყარებაში და საერთო ენის გამონახვაში ეხმარება. ფსიქოლოგთა აზრით, ნეკზე ბეჭედი ხშირად ინტრიგანებსა და ავანტიურისტებს უკეთიათ. ბეჭდიანი ნეკი აზარტული თამაშებისადმი და ფლირტისადმი მიდრეკილებაზეც მიუთითებს.
ბეჭედი ფეხის თითზე
ფსიქოლოგების უმრავლესობის აზრით, ბეჭდები ფეხის თითებზე ერთ სურვილს გამოხატავს: იყოს გამორჩეული და ყურადღება მიიქციოს. ზოგჯერ ეს მომეტებულ თავმოყვარეობასა და გადამეტებულ თვითშეფასებაზეც მიუთითებს.
