ღამის მადის სინდრომის ზუსტი მიზეზები ჯერ გარკვეული არაა, მაგრამ ხშირად გვხვდება ზედმეტი წონის, დეპრესიისა და სხვა დარღვევების მქონე ადამიანებში.
სტატისტიკის მიხედვით, ღამის მადის სინდრომი მოსახლეობის 1,1-1,5%-ს აღენიშნება. ზედმეტი წონის მქონე ადამიანებში კი მსგავსი დარღვევა ყოველ მეათეს აქვს.
დიეტოლოგთა განცხადებით, ღამის მადის სინდრომზე საუბარი მხოლოდ იმ შემთხვევაში შეიძლება, როცა სადღეღამისო კალორიების 25%-ზე მეტს ადამიანი ვახშმიდან საუზმემდე პერიოდში იღებს.
ამას გარდა, ამ სინდრომს შემდეგი გამოვლინებები აქვს:
დილით უმადობა;
საღამოს და ღამით მადის მომატება;
კვირაში არანაკლებ სამჯერ უძილობა, ანდა ძილის სხვა დარღვევები (ხშირი გაღვიძება, ზედაპირული ძილი);
საკვების მიღება საჭიროა იმისთვის, რათა დაიძინონ ანდა ძილი შეიბრუნონ;
საღამოობით უხასიათობა.
დიაგნოზს დაავადების ანამნეზის, პაციენტის ჩივილისა და ამ დარღვევის შესაბამისი სიმპტომების საფუძველზე ადგენენ. შესაძლებელია, საჭირო გახდეს ინსტრუმენტალური გამოკვლევის აუცილებლობა - პოლისომნოგრაფია. ეს ანალიზი ღამის ძილის სტრუქტურაზე, ფაზების რაოდენობაზე და თავის ტვინის ბიოელექტრულ აქტივობაზე უფრო მეტ ინფორმაციას იძლევა.
დაბოლოს - მკურნალობა
არსებობს ამ დარღვევის მკურნალობის რამდენიმე მეთოდი:
1. დიეტოთერაპია. ის პაციენტის კვებისადმი სწორი მიდგომის ჩამოყალიბებას გულისხმობს. ხდება საკვები ქცევის კორექცია, საკვები დღიურის წარმოება.
2. ფოტოთერაპია. მკურნალობის აღნიშნული მეთოდი მელატონინის წარმოების სტიმულაციას უკავშირდება. ეს ჰორმონი პასუხს აგებს ძილის ბიოლოგიურ რიტმსა და ციკლებზე.
3. ფსიქოთერაპია. ის პაციენტში შესაბამისი მოტივაციის წარმოშობისა და ფორმირების კორექციას ემსახურება.
4. მედიკამენტოზური თერაპია. არსებობს პრეპარატები, რომლებიც ღამის ძილს აუმჯობესებს და მადას ამცირებს. მსგავსი პრეპარატების მიღება მხოლოდ ექიმის მკაცრი ზედამხედველობის ქვეშ შეიძლება.
ღამის მადის სინდრომის ძირითადი გართულება ზედმეტი წონაა. მაგრამ ექიმის კონსულტაცია და სწორი მიდგომა უარყოფით შედეგებს აგაშორებთ და გამოჯანმრთელებაში შეგიწყობთ ხელს.