კობრის უკანასკნელი კოცნა
საკნატუნო ამბები
33 წლის მალაიზიელ აბუ ზარინ ჰუსეინს დიდი პოპულარობა მოუტანა ერთმა თამამმა ტრიუკმა, რომელსაც ის საზოგადოების თვალწინ ატარებდა: ჰუსეინი შხამიან გველს კოცნიდა. რა თქმა უნდა, ყველაფერი ნამდვილი იყო - გველიც, კოცნაც და შხამიც...
-
ჰუსეინი ადგილობრივი სახანძრო დეპარტამენტის სპეციალურ ქვედანაყოფს ხელმძღვანელობდა, რომლის ამოცანა სოფლებში შხამიანი გველების დაჭერა იყო. მას გველებმა ადრეც რამდენჯერმე უკბინეს, ხოლო 2015 წელს კობრის კბენის შემდეგ ორი დღე კომაში გაატარა. ამის მიუხედავად, თავისი საქმიანობის მიტოვებას არ აპირებდა, თუმცა კი აღნიშნავდა, რომ ეს საქმე სუსტი ნერვების პატრონებისთვის არ იყო.
-
„გველის ნაკბენი იმდენად მტკივნეულია, რომ მისი აღწერა შეუძლებელია“, - ჰყვებოდა ჰუსეინი.
-
გამოცდილების გამო მას გველების მომთვინიერებელს უწოდებდნენ. ის ხელქვეითებს გველების დაჭერას ასწავლიდა და ერთხელ „აზია ეძებს ტალანტებს“ შოუშიც გამოვიდა, სადაც შხამიანი გველების მონაწილეობით შეასრულა ნომერი.
-
ბოლო გამოწვევა ჰუსეინისთვის საბედისწერო აღმოჩნდა. ის ქალაქ ბენტონგში გველის დაჭერას ცდილობდა, მაგრამ გველმა კბენა მოასწრო. ექიმებმა ჰუსეინის გადარჩენა ვერ შეძლეს. ის რამდენიმედღიანი კომის შემდეგ გარდაიცვალა.
