ვერდიქტი: მავნებელია
აღმოჩნდა, რომ ზოგიერთი ექიმი ასე სულაც არ ფიქრობს, რომ სუპები თუ ბულიონები ორგანიზმისთვის აუცილებელია და პირიქით, გვირჩევს, იშვიათად ვჭამოთ სუპი.
არ ელოდით, ხომ? არც ჩვენ...
მათი არგუმენტი კი ასეთია: წვნიანები იშვიათად უნდა მივიღოთ, რადგან ამ დროს სითხე რეაქციაში შედის კუჭის წვენთან, რაც საჭმლის მომნელებელი სისტემის გაუარესებას იწვევს. ამასთანავე, ბოსტნეული ხარშვისას, უკვე 60 გრადუსზეც კი, კარგავს თავის სასარგებლო თვისებებს. ხორციანი წვნიანის მომზადებისას კი წვენში იხსნება ის ჰორმონალური პრეპარატები და ანტიბიოტიკები, რომლებსაც ცხოველის/ფრინველის ფერმებში ზრდის სტიმულაციისა და დაავადებების პროფილაქტიკის მიზნით იყენებენ.
ვერდიქტი: სასარგებლოა
ექიმების დიდი ნაწილი კი აღნიშნავს, რომ წვნიანებზე უარის თქმა კატეგორიულად დაუშვებელია, რადგან იწვევს შეკრულობას, დისკომფორტს მუცლის ღრუში და ტოქსინების მომრავლებას.
მათი არგუმენტი კი ასეთია: ნებისმიერი ბულიონი, იქნება ეს ხორცისა თუ ბოსტნეულის, შეიცავს ექსტრაქტიულ ნივთიერებებს. ეს არის ჟელესმაგვარი ნივთიერება, რომელიც სასარგებლოა როგორც კუნთოვანი, ისე ხრტილოვანი ქსოვილისთვის.
ნებისმიერი წვნიანი აუმჯობესებს ნაწლავების პერისტალტიკას, კუჭის ფერმენტულ აქტიურობას, ეს კი, თავის მხრივ, ხელს უწყობს საკვების უკეთ მონელებას. ამასთანავე, ნაკლებკალორიულია (გამონაკლისების გარდა), ადვილად გვანაყრებს და აღიარებულია თავისი მასტიმულირებელი და პროფილაქტიკური თვისებებით.
ამის შესახებ, პრინციპში, ბავშვობიდან ყველას გვესმის...
ოქროს შუალედი:
ა) ხორცის მოხარშვისას პირველი ნახარში (წამოდუღებიდან 2-3 წუთში) გადაღვარეთ - ჰორმონები და ანტიბიოტიკები მას გაჰყვება და შემდეგი ნახარში უვნებელი იქნება.
ბ) ბოსტნეულის სუპის მომზადებისას კი ბოსტნეული კარგად უნდა გაირეცხოს, გასუფთავდეს, კარგია, თუ წყალში გააჩერებთ ნახევარი საათით. ქვაბში ყველაფერს ერთად ნუ ჩაყრით, რომელი პროდუქტიც უფრო დიდხანს იხარშება, უფრო ადრე ჩადეთ, რაც სწრაფად იხარშება - მოგვიანებით. ვიტამინების შესანარჩუნებლად, ასევე, უმჯობესია, ჯერ წყალი აადუღოთ და მხოლოდ შემდეგ ჩაყაროთ მასში ბოსტნეული.
***
საბოლოო არჩევანი კი, რა თქმა უნდა, თქვენზეა.