იანვარი - ჯგუფმა „მეფე და მასხარა“ 25-წლიანი მოღვაწეობის შემდეგ არსებობა შეწყვიტა. ჯგუფის ლიდერის, მიხეილ გორშენევის გარდაცვალების შემდეგ, კოლეგებმა გადაწყვიტეს, რომ პროექტი უნდა დასრულებულიყო.
არსებობა შეწყვიტეს უცხოურმა მუსიკალურმა ჯგუფებმა „Crystal Castles“, „The Knife“, „Guided By Voices“, „Orbital“ და „The Rapture“.
თებერვალი - ცნობილი რეჟისორი ვუდი ალენი 28 წლის გერმა დილან ფეროუმ გაუპატიურებაში ამხილა მისი თქმით, ეს 21 წლის წინათ მოხდა. ჯერ კიდევ 1992 წელს, რეჟისორის მეუღლემ, მსახიობმა მია ფეროუმ ქმარი არასრულწლოვანთა გარყვნაში დაადანაშაულა. ვუდი ალენმა ორივე ბრალდება უარყო და განაცხადა, რომ მის წინააღმდეგ სისხლის სამართლის საქმე არ აღძრულა, მაგრამ საზოგადოების უარყოფითი დამოკიდებულება კი დარჩა.
მარტი - მხატვრული ფილმი „მონობის 12 წელი“, როგორც წლის საუკეთესო ფილმი, „ოსკარით“ დაჯილდოვდა. ფილმში მოთხრობილია შავკანიანი მოქალქის სოლომონ ნორტაპის ისტორია, რომელიც მშობლიური ქალაქიდან მოიტაცეს და მონად გაყიდეს. ეკრანებზე გამოსვლის შემდეგ, სკოლის მრჩეველთა ეროვნულმა ასოციაციამ ფილმის სასკოლო პროგრამაში ჩართვა გადაწყვიტა.
აპრილი - 17 აპრილს მექსიკაში ცნობილი კოლუმბიელი მწერალი, ლათინოამერიკული კულტურული მიმდინარეობის - „მაგიური რეალიზმის“ ერთ-ერთი ფუძემდებელი გაბრიელ გარსია მარკესი გარდაიცვალა. კოლუმბიაში 3-დღიანი გლოვა გამოცხადდა.
მაისი - კონჩიტა ვურსტი საერთაშორისო კონკურსის „ევროვიზია 2014“-ის გამარჯვებული გახდა და მსოფლიო საზოგადოება ორ ბანაკად - მომხრეებად და მოწინააღმდეგეებად დაყო.
ივნისი - უკრაინაში განვითარებული მოვლენების გამო რუსეთის სხვადასხვა ქალაქებში მსოფლიო დონის შემსრულებლებისა და ანსამბლების კონცერტები ერთი მეორეს მიყოლებით უქმდებოდა.
ივლისი - მუსიკალური კონკურსი „ახალი ტალღა“, რომელიც 2002 წლიდან ლატვიის ქალაქ იურმალაში იმართებოდა, სხვაგან ჩატარდება. ამის მიზეზი ლატვიის საგარეო საქმეთა მინისტრის გადაწყვეტილება გახდა, რომელმაც რუს მომღერლებს - იოსიფ კობზონს, ოლეგ გაზმანოვსა და ვალერიას ქვეყნის ტერიტორიაზე შესვლა აუკრძალა.
ცნობისათვის - გაზმანოვი და ვალერია კონკურსის ჟიურის წევრები იყვნენ.
აგვისტო - 62 წლის ასაკში ლეგენდარულმა მსახიობმა რობინ უილიამსმა თავი მოიკლა.
სექტემბერი - ანდრეი კონჩალოვსკის ფილმი ვენეციის კინოფესტივალზე დაჯილდოვდა.
ოქტომბერი - მოსკოვში აფრიკელი მხატვრის ბრეტ ბეილის სკანდალური გამოფენა „Exhibit“ გაიხსნა და საკმაოდ მშვიდ ვითარებაში წარიმართა, თუმცა რუსეთისგან განსხვავებით, ლონდონსა და პარიზში აღნიშნულ გამოფენას საპროტესტო აქციებით დაუპირისპირდნენ, რადგან შოუ რასიზმში დაადანაშაულეს.
რეჟისორის სიტყვებით მას მხოლოდ ადამიანური სისასტიკის ჩვენება სურდა.
ნოემბერი - „Sony Pictures Entertainment“-ზე კიბერშეტევა განხორციელდა, რომელზეც პასუხისმგებლობა კორეულმა მხარემ აიღო. მიუხედავად იმისა, რომ შეტევის შემდეგ ბევრი ინფორმაცია გამომჟღავნდა, ჰაკერების სამიზნე ფილმი „ინტერვიუ“ გახლდათ, რომელიც კორეის ლიდერს კიმ ჩენ ინს ეძღვნება. ჰაკერებმა მიმართვა გაავრცელეს და პრემიერის შემთხვევაში „Sony Pictures“-ს ტერაქტის მოწყობით დაემუქრნენ. მუქარის შემდეგ აშშ-ს კინოთეატრების რამდენიმე მსხვილმა ქსელმა ფილმის გაშვებაზე უარი განაცხადა.
დეკემბერი - ლეგენდარული მომღერალი ჯო კოკერი გარდაიცვალა.
