შეცდომები ხშირად რომ არ დაუშვათ, კულინარიის სფეროში თქვენი ცოდნის გასამდიდრებლად რამდენიმე რჩევას გთავაზობთ.
1) მაკარონი ყოველთვის დიდ ქვაბში მოხარშეთ!
დიდ ჭურჭელში მაკარონი თავისუფლად მოიხარშება და ერთმანეთს არ მიეწებება. მდუღარე წყალში მაკარონის ჩაყრამდე აუცილებლად ჩაყარეთ მარილი - ასე გვირჩევენ იტალიელი დიასახლისები.
2) დანები დანიშნულების მიხედვით გამოიყენეთ!
ფართეპირიანი დანა მოსახერხებელია ბოსტნეულისა და ხორცის დასაქუცმაცებლად. ვიწროპირიანი დანა ბოსტნეულის გასაწმენდად და პატარა დეტალების მოსაცილებლად გამოგადგებათ, ისეთების, როგორიც პატარა შავი წერტილებია კარტოფილზე. ხერხისპირიანი დანა იდეალურია პურისა და ფუნთუშების, კარაქისთვის. დანების დანიშნულებისამებრ გამოყენებით საქმეს სამზარეულოში ბევრად გაიიოლებთ.
3) არ გამოიყენოთ სამზარეულოს პატარა დაფები!
სამზარეულოს პატარა დაფებს თუ იყენებთ, დიდ შეცდომას უშვებთ. დაფის დაჭრილი ინგრედიენტებისაგან გათავისუფლება ხშირ-ხშირად მოგიწევთ, პატარა ნაჭრები კი არა მარტო მაგიდაზე, იატაკზეც გადმოცვივდება. გამოიყენეთ დიდი ზომის დაფა და დაზოგეთ დრო და ენერგია.
4) ნუ შეინახავთ პომიდორს მაცივარში!
პომიდვრის მაცივარში შენახვა არ ღირს, რადგან ის ტემპერატურის ცვლილების გამო კარგავს გემოს, ხდება განსხვავებული კონსისტენციის. სჯობს, პომიდორი ქაღალდის პაკეტში გაახვიოთ, ანდაც ერთ ფენად დააწყოთ მუყაოს კოლოფში. ასე ბოსტნეული, დაახლოებით, 5 დღე შეინარჩუნებს თავის თვისებებს.
5) არავითარ შემთხვევაში არ ჩადოთ დანა ჭურჭლის სარეცხ მანქანაში!
მაღალი ტემპერატურისაგან მჭრელი პირი ფუჭდება და დანა ბლაგვდება. იმისათვის, რომ დანა დიდხანს გამოიყენოთ, გარეცხვის შემდეგ კარგად გაწმინდეთ მშრალი ტილოთი და მშრალ ადგილას შეინახეთ.
6) შემწვარი კერძი გემრიელი რომ იყოს, დიდ ჭურჭელში მოამზადეთ!
შედეგი მაშინ იქნება საუკეთესო, თუ ნაჭრები შეწვისას ერთმანეთს არ შეეხება. კიდევ ერთი: თუ კარტოფილსა და ქათამს შეწვის წინ კარგად გაამშრალებთ, ჩვეულებრივი კერძის არაჩვეულებრივ ვარიანტს მიიღებთ. სცადეთ და თავად ნახავთ!
7) ამოარჩიეთ ცხიმიანი ფარში!
ცხიმიან ფარშს მომზადებისას თავისი წვენი ექნება, რომელიც კერძებს ყოველთვის უხდება. ღვეზელი არასდროს გამოგივათ გემრიელი, თუ მის დასამზადებლად უცხიმო ხორცს აირჩევთ. ფარშს რომ კარგი გემო ჰქონდეს, აუცილებლად დაუმატეთ ცოტა უმი ხახვი.
8) ცომის მომზადებისას ფქვილი ინგრედიენტებს ნელ-ნელა, თანდათანობით დაუმატეთ!
ცხიმისა და ფქვილის სწრაფი გადარევით ცომი წებოვანი ხდება. ასეთი ცომი მხოლოდ მაშინ გამოგადგებათ, თუ პიცას ამზადებთ. მაგრამ ჰაეროვანი ცომის მომზადებისათვის მოსახერხებელია, ფქვილი ცოტ-ცოტა დაამატოთ და დაბალი სიჩქარით მიქსერით თანდათან გადაურიოთ.
9) ვიდრე პროდუქტს ცხიმიან ტაფაზე მოათავსებთ, ტაფა აუცილებლად გააცხელეთ!
ამის შესახებ ყველამ იცის, მაგრამ იმდენად მნიშვნელოვანი დეტალია, ღირს კიდევ ერთხელ წარმოთქმა. ვიდრე პროდუქტებს ცხიმიან ტაფაზე მოათავსებდეთ, აუცილებლად უნდა გააცხელოთ ტაფა. თუ კერძის ინგრედიენტებს ცივ ტაფაზე დადებთ, შეწვის პროცესში ტაფას მიეკრობა და საქმეს სულ გაგიფუჭებთ.