„ექსპო ჯორჯიას“ საგამოფენო დარბაზში 29-30 ივნისს ანა გოგუაძის რიგით მეხუთე ფოტოგამოფენა გაიმართა. გამოფენა-გაყიდვით შემოსული თანხა 13 ივნისის სტიქიით დაზარალებულთა დასახმარებლად გადაირიცხება.
გამოფენაზე ხელოვანმა პარიზული გაზაფხულის 25 ფოტო წარმოადგინა.
- გაზაფხულის მიმართ განსაკუთრებული დამოკიდებულება მაქვს. პარიზში გამზავრების სურვილი კი, დაახლოებით, 13 წლის წინ გამიჩნდა. როცა პირველად მოვისმინე ცნობილი ჯაზური თემა „აპრილი პარიზში“, ვთქვი, რომ აუცილებლად წავალ პარიზში, მაგრამ - მხოლოდ აპრილის თვეში.
ასეც მოხდა. როდესაც გადაწყდა ჩემი გამგზავრების საკითხი, გადავწყვიტე, ფოტოპროექტით დავბრუნებულიყავი. ჩემი ხანმოკლე მოგზაურობის დროს გადაღებული ფოტოების გმირები ჩვეულებრივი ადამიანები არიან, რომლებიც თანამედროვე პარიზის ყოველდღიურობას ქმნიან,“ - გვიამბობს ხელოვანი.
გამოფენა „ანას პარიზი აპრილში“ 14 ივნისს უნდა გახსნილიყო, თუმცა 13-ში მომხდარი სტიქიის გამო გადაიდო.
ანამ გადაწყვიტა, უკვე 29-30 ივნისს მოწყობილ გამოფენაზე თავისი ნამუშევრები გაეყიდა და სტიქიის ტრაგიკულ ღამეს დაზარალებულთა დახმარებაში თავისი წვლილი შეეტანა.
- ვფიქრობ, გამოფენის დღეებმა წარმატებულად ჩაიარა. 25-იდან 13 ნამუშევარი უკვე გაყიდულია და იმედი მაქვს, შემოდგომას კიდევ მექნება გამოფენის საშუალება, - ამბობს ხელოვანი