თაფლისა და კვერცხის გულის ნიღაბი
1 ჩ.კ. თაფლი და 1 კვერცხის გული ათქვიფეთ ერთგვაროვანი მასის მიღებამდე.
მიღებული მასა სახესა და ყელზე შეიზილეთ, 15-20 წუთის შემდეგ კი თბილი წყლით კარგად ჩამოიბანეთ.
ეს ნიღაბი შესანიშნავად ატენიანებს კანს. კვერცხის გულში შემავალი ვიტანიმი A კი ეფექტურად ებრძვის წვრილ-წვრილ ნაოჭებს და კანის დაბერების პროცესს საგრძნობლად აფერხებს.
შვრიის, ნუშისა და თაფლის ნიღაბი
1 ს.კ. შვრიის ბურღული („გერკულესი“) და 5 ც. ნუში დააბლენდერეთ, დაამატეთ 1 ჩ.კ. თაფლი (თუ ძალიან სქელი მასა გამოვა, შეგიძლიათ, გადადუღებული წყლით გაათხელოთ) და მიღებული მასა სახესა და ყელზე შეიზილეთ.
5-10 წუთის შემდეგ ნიღაბი თბილი წყლით ჩამოიბანეთ, სახეზე კი თქვენი კანის ტიპის შესაბამისი მკვებავი კრემი შეიზილეთ.
ეს ნიღაბი ღრმად წმენდს კანს, აშორებს მკვდარ უჯრედებს და ხელს უწყობს კანის რეგენერაციის პროცესს.
თაფლის, ხაჭოსა და არაჟნის ნიღაბი
1 ჩ.კ. თაფლი, 3 ს.კ. ხაჭო და 1 ჩ.კ. არაჟანი ერთმანეთში აურიეთ და წაისვით სახესა და ყელზე.
15 წუთის შემდეგ ნიღაბი თბილი წყლით ჩამოიბანეთ და სახეზე რომელიმე მკვებავი კრემი შეიზილეთ.
ეს ნიღაბი სახის კანს ჯანსაღ იერს აძლევს. არაჟანში შემავალი კალციუმი და ხაჭოსა და თაფლში შემავალი მაგნიუმი კი ხელს უწყობს კოლაგენის (ადამიანის ორგანიზმში ერთ-ერთი ყველაზე გავრცელებული ცილის) გამოყოფას, რომელიც კანს სიმკვრივესა და ელასტიკურობას ანიჭებს.
ჩაის ხისა და შვრიის ნიღაბი
2-3 ს.კ. შვრიის ბურღული დააბლენდერეთ, დაასხით 5 ჩ.კ. თბილი წყალი და 5-10 წუთით თავდახურულ ჭურჭელში გააჩერეთ. შემდეგ დაამატეთ 7-10 წვეთი ჩაის ხის ზეთი და 1 ჩ.კ. ლიმონის წვენი. კარგად აურიეთ და სახესა და ყელზე თანაბარ ფენად დაიდეთ.
5-10 წუთის შემდეგ ნიღაბი თბილი წყლით ჩამოიბანეთ და სახეზე მკვებავი კრემი შეიზილეთ.
ეს ნიღაბი შესანიშნავად კვებავს კანს და ავიწროებს ფორებს. ჩაის ხის ზეთის ძლიერი ანტიბაქტერიული თვისება კი ებრძვის სახეზე არსებულ გამონაყარსა და ანთებით პროცესებს.
შვრიისა და რძის ნიღაბი
1 ს.კ. შვრიის ბურღული („გერკულესი“) დააბლენდერეთ, დაასხით 3 ს.კ. თბილი რძე და კარგად მოურიეთ ერთგვაროვანი მასის მიღებამდე.
წაისვით ნიღაბი სახეზე, ყელსა და დეკოლტეზე, 20-25 წუთის შემდეგ კი თბილი წყლით ჩამოიბანეთ.
ეს ნიღაბი საუკეთესოდ კვებავს კანს, ანიჭებს ჯანსაღ ფერსა და ხავერდისებურ იერს.
ნიღაბი შესანიშნავია იმითაც, რომ უკუჩვენება არ აქვს და შეგიძლიათ, აბსოლუტურად ყველა ტიპის კანზე გამოიყენოთ.