როგორ „გამოვაცოცხლოთ“ მშრალი და უსიცოცხლო თმა?!

კეფირის ნიღაბი
კეფირი ოდნავ შეათბეთ (დაახლოებით 37 გრადუსამდე) და წრიული მოძრაობებით ჯერ თმის ძირებში, ხოლო შემდეგ თმის მთელ სიგრძეზე კარგად შეიზილეთ.
თავი პოლიეთილენის პარკით შეიხვიეთ, ზემოდან პირსახოცი შემოიხვიეთ და 30 წუთით გაიჩერეთ.
ამის შემდეგ თმა თბილი წყლით ჩამოიბანეთ.
აღნიშნული ნიღაბი სწრაფად აღადგენს მშრალი და დაზიანებული თმის სტრუქტურას და თმას სასიამოვნო ბზინვარებას მიანიჭებს.

ქაცვის ზეთის ნიღაბი
1 ან 2 ს.კ. რომელიმე მცენარეულ ზეთს დაამატეთ 1 ჩ.კ. ქაცვის ზეთი და კარგად აურიეთ.
მიღებული სითხე თმის ძირებში კარგად შეიზილეთ, თავზე კი პირსახოცის ან ჩვეულებრივი ბამბის („კოტონის“) ქუდი დაიფარეთ.
1 საათის შემდეგ თმა შამპუნით ჩამოიბანეთ.
აღნიშნული ნიღაბი კეთდება კვირაში 2-ჯერ, მთლიანი კურსი კი 10 პროცედურას შეადგენს.

ნიღაბი ლუდით
1 ჭ. ლუდში ჩაასხით 1 ჩ.კ. ზეითუნის ან ნუშის ზეთი და კარგად აურიეთ.
მიღებული სითხე შეიზილეთ თმაში და 20-30 წუთი გაიჩერეთ.
შემდეგ თმა თბილი წყლითა და შამპუნით კარგად ჩამოიბანეთ.
ეს ნიღაბი შეიცავს B ვიტამინს და განსაკუთრებით ეფექტურია გაყოფილი ბოლოების სამკურნალოდ, თმის სტრუქტურის აღსადგენად და თმის მტვრევადობის შესაჩერებლად.

ბირკავას ზეთისა და თაფლის ნიღაბი
1 ს.კ. ბირკავას („რეპეინოე“) ზეთი, 1 ს.კ. ალოეს წვენი და 1 ჩ.კ. თაფლი ერთმანეთში კარგად აურიეთ და მიღებული მასა თმაში (თმის ძირებიდან ბოლოებამდე) შეიზილეთ.
თავი პოლიეთილენის პარკითა და პირსახოცით შეიფუთეთ.
1 საათის შემდეგ შამპუნით ჩამოიბანეთ.

კვერცხის ნიღაბი
1 კვერცხი, 1 ჩ.კ. ძმარი, 1 ჩ.კ. გლიცერინი და 2 ს.კ. აბუსალათინის ზეთი ერთმანეთში კარგად აურიეთ და მიღებული მასა თმის მთელ სიგრძეზე და თმის ძირებში კარგად შეიზილეთ.
შემდეგ პირსახოცი შეათბეთ და თმა იმით შეიფუთეთ. პირსახოცი გაგრილებისთანავე კვლავ თბილი პირსახოცით შეცვალეთ და ასე გააგრძელეთ 30-35 წუთის განმავლობაში.
ამის შემდეგ თმა შამპუნით კარგად ჩამოიბანეთ.
აღნიშნული პროცედურა კვირაში 1-2-ჯერ უნდა ჩატარდეს.

თაფლის ნიღაბი
1 ს.კ. ზეითუნის ზეთი (შეგიძლიათ, სხვა რომელიმე მცენარეული ზეთის გამოყენება), 1 კვერცხის გული, 1 ჩ.კ. თაფლი, 1 ჩ.კ. „ხნა“ და 1 ჩ.კ. კონიაკი ერთმანეთში კარგად აურიეთ და მიღებული მასა თმაში შეიზილეთ.
30-40 წუთის შემდეგ თმა თბილი წყლითა და შამპუნით ჩამოიბანეთ.

ნიღაბი თაფლითა და ბანანით
2 ც. ბანანი და 2 ს. კ. თაფლი ერთმანეთში აურიეთ, დაამატეთ 1 ჭ. იოგურტი და თმაში კარგად შეიზილეთ.
20 წუთის შემდეგ თმა ჩამოიბანეთ.
აღნიშნული ნიღაბი თმას უფრო დამყოლს ხდის, აჯანსაღებს და ბზინვარებას ანიჭებს.

პურის ნიღაბი
1-2 ნაჭერი ჭვავის პური თავის დაბანამდე რამდენიმე საათით ადრე წყალში ჩაალბეთ, შემდეგ აურიეთ ისე, რომ ფაფის სისქის, ერთგვაროვანი მასა მიიღოთ და მიღებული ნიღაბი თმაში შეიზილეთ.
შეიფუთეთ თმა პოლიეთილენის პარკით, 15 წუთის შემდეგ კი ნიღაბი თბილი წლით (უშამპუნოდ) ჩამოიბანეთ.
პურის ნიღაბი თმას აძლიერებს, ასქელებს და ბზინვარებას ანიჭებს.

კაკაოსა და ხაჭოს ნიღაბი
3 ს.კ. უცხიმო ხაჭოს დაუმატეთ ცოტაოდენი წყალი, 1 ჩ.კ. კაკაოს ფხვნილი და კარგად აურიეთ, ვიდრე სქელ, მუქ მასას არ მიიღებთ.
მიღებული მასა სველ თმაზე წაისვით, თავი პოლიეთილენის პარკითა და თბილი პირსახოცით შეიხვიეთ. ერთი საათის შემდეგ თმა წყლითა და შამპუნით კარგად ჩამოიბანეთ.
ეს ნიღაბი უნდა გაიკეთოთ კვირაში 2-3-ჯერ, 2-3 თვის განმავლობაში.
ნიღაბი ეფექტურია მშრალი და უსიცოცხლო თმის სწრაფად გამოსაჯანსაღებლად. კაკაოს წყალობით თქვენი თმა უფრო სწრაფად გაიზრდება, აღარ დაგცვივდებათ და მეტ ბრწყინვალებას შეიძენს, ხოლო ხაჭოს შემადგენლობაში შემავალი კალციუმი თმის ღერებს გაამაგრებს და გააძლიერებს.