სახის ექსპრესნიღბები - გაახალგაზრდავება მომენტალურად!

ექსპრესსაფენი - სახის „რეანიმაცია“
1 პაკეტი მწვანე ჩაი (დანამატების გარეშე);
1 პაკეტი სააფთიაქო პიტნის ჩაი;
1 პაკეტი სააფთიაქო გვირილის ჩაი;
2 ჭ. წყალი.
დაასხით ცხელი წყალი პიტნისა და გვირილას პაკეტებს, დააცადეთ, ცოტათი შეგრილდეს და დაამატეთ მწვანე ჩაის პაკეტი. დაელოდეთ 15-20 წუთი, შემდეგ პაკეტები წყლიდან ამოიღეთ და კარგად გაწურეთ. ნაყენში კი ჩაალბეთ პირსახოცის ნაჭერი, ოდნავ გაწურეთ და დაიფინეთ სახეზე 10-20 წუთით. ამ ხნის განმავლობაში ნაჭერი რამდენჯერმე დაასველეთ ნაყენში. პროცედურის შემდეგ სახეს ნუ ჩამოიბანთ, უბრალოდ, მოიწმინდეთ სველი ხელსახოცით და შეიზილეთ დამარბილებელი კრემი ან გელი.


ექსპრესლიფტინგი - „სწრაფი გაახალგაზრდავება“
1 კვერცხის ცილა;
1 ჩ.კ. თეთრი თიხა;
1/3 ჩ.კ. ახალგამოწურული ლიმონის წვენი.
ათქვიფეთ კვერცხის ცილა თიხასთან და ლიმონის წვენთან ერთად. მიღებული მასა წაისვით სახეზე 2-3 ფენად (ყოველი მომდევნო ფენა წინა ფენის კარგად გაშრობის შემდეგ წაისვით). ნიღაბი გაიჩერეთ ბოლო ფენის კარგად გაშრობამდე, შემდეგ დაიბანეთ გრილი წყლით და სახეზე რომელიმე ნაკლებად ცხიმიანი კრემი ან გელი წაისვით.

ექსპრესდატენიანება და გაახალგაზრდავება
1 ს.კ. ლიოტონის გელი (უნდა გააცივოთ მაცივარში);
1 ჩ.კ. ვიტამინი E (ზეთოვანი).
აურიეთ ერთმანეთში ლიოტონი და ვიტამინი E და მიღებული მასა სახეზე სქელ ფენად წაისვით. გაიჩერეთ 15-20 წუთით. ნიღაბი მოიშორეთ ხელსახოცით, შემდეგ სახე დაიბანეთ გრილი ან ცივი წყლით და რომელიმე მსუბუქი დამარბილებელი გელი წაისვით.

ყავა თაფლითა და ლიმონით - ექსპრეს „გარდასახვა“
1 ს.კ. ზეითუნის ზეთი;
1 ჩ.კ. წვრილად დაფქვილი ყავა;
1 ჩ.კ. ველური ან ოდნავ ჩაშაქრებული თაფლი;
1 ჩ.კ. ახალდაწურული ლიმონის წვენი (თუ მშრალი კანი გაქვთ, ლიმონის წვენი უმჯობესია ცხიმიანი იოგურტით შეცვალოთ).
ზემოჩამოთვლილი ინგრედიენტები აურიეთ ერთმანეთში და წრიული მოძრაობებით სახეზე, ყელსა და დეკოლტეზე წაისვით. გაიჩერეთ 10-15 წუთით და ჩამოიბანეთ ჯერ თბილი, შემდეგ ცივი წყლით.

ექსპრესგაწმენდა და დეზინფექცია
2 ს.კ. წყალბადის ზეჟანგი;
2 ს.კ. გადადუღებული წყალი (გაციებული);
10-20 წვეთი ჩაის ხის ზეთი;
2 ჩ.კ. თეთრი თიხა;
2 ჩ.კ. შვრიის ბურღული („გერკულესი“).
ინგრედიენტები აურიეთ ერთმანეთში და წაისვით სახეზე ინტენსიური წრიული მოძრაობებით (განსაკუთრებით პრობლემურ ადგილებზე). ნიღაბი გაიჩერეთ სახეზე 20-30 წუთით, შემდეგ კარგად ჩამოიბანეთ და სახეზე მსუბუქი გელი წაისვით (უკეთესია გელში რამდენიმე წვეთი ჩაის ხის ზეთიც ჩაამატოთ).