X

ბექა ონიანი: „ზოგს ტაქსისტიც ვგონივარ!“

სტუმრად ცნობილებთან
11.01.2017 20:00
427

 „ჩემი ყოველი ნაბიჯი მანქანას უკავშირდება და შეიძლება ითქვას, რომ მასზე ზედმეტად ვარ დამოკიდებული“, - რას ჰყვება იუმორისტი ბექა ონიანი Funtime - თან.

  

ფოტოგრაფი: ალექსანდრე სხულუხია
  • მძღოლი თუ ტრაბახობს, ის არ ყოფილა კარგი მძღოლი. მანქანას ჩვეულებრივად ვმართავ. მეშვიდე კლასში უკვე ვიჯექი საჭესთან, თუმცა ეს რაიონში იყო. სრულწლოვანი რომ გავხდი, მართვის მოწმობაც ავიღე.

  • მოძრაობის წესებს შეძლებისდაგვარად ვიცავ, თუმცა ხშირ შემთხვევაში დარღვევაც მიწევს, ესეც ჩვენი ქაოსური მოძრაობის გამო. თბილისში გამუდმებით პიკის საათი და გადატვირთული მოძრაობაა. ვიცი, რომ უპირატესობა წრეზე შემომსვლელებს აქვთ, მაგრამ ხშირ შემთხვევაში ეს თვითონ არ იციან და ჩერდებიან, რაც იმას ნიშნავს, რომ გზა უნდა განვაგრძო და მოძრაობის წესი უნებურად დავარღვიო.

  • კანონს შეგნებულად არასდროს ვარღვევ. ყოველ შემთხვევაში, გამორიცხულია, ზებრა გადასასვლელზე ფეხით მოსიარულეს გზა არ დავუთმო. ქვეითებს დიდ პატივს ვცემ.

  • „სითი პარკის“ შეძენას ვერასდროს ვახერხებ, ამიტომ ჯარიმების გადახდა ძალიან ხშირად მიწევს. რაც შეეხება პატრულს, იშვიათად მაჩერებს. მოძრაობის დროს ვუცვნივარ და მომსალმებია კიდეც.

  • არ ვარ ის ადამიანი, რომელიც მძღოლს გააკრიტიკებს მხოლოდ იმიტომ, რომ ის ქალია. განა მე არ გავუკვირვებივარ საოცარი მანევრით მანდილოსანს, მაგრამ ვაიმე, ეს რა გააკეთაო, ამის თქმას მირჩევნია, ჩემთვის შევინახო. ქალები არიან და ისე დაიხვეწებიან, შეიძლება ბევრ მამაკაც მძღოლებსაც აჯობონ.

  • ჩემი ყოველდღიურობა ოჯახზე ზრუნვა და სამსახურია. გარდა იმისა, რომ „კომედი გრუპის“ წევრი ვარ, ბიზნესიც წამოვიწყე. ორბეთში აგარაკი მაქვს და გაზაფხულზე დიდ აქტივობებს ვგეგმავ. მხიარულ ექსკურსიებსა და სპორტულ-გამაჯანსაღებელ დღეებს მოვაწყობ. ახალი პროექტიც მაქვს - ბუშტების ფეხბურთი, რომელსაც საზოგადოებას ახლა ვაცნობ.

  • სხვათა შორის, მოძრაობის დროს ხალხისგან დადებითი ემოციებით განებივრებული ვარ. მე ხომ არ ვაკვირდები სხვა მანქანებს, მოძრაობას ვაკონტროლებ. ჩემი ცოლი მეტყვის ხოლმე, გიცნეს, ხელი აგიწიეს და გაუღიმეო. ასეთი ადამიანები დღის განმავლობაში ჩემზე დადებითად მოქმედებენ და კარგ განწყობას მიქმნიან.

  • 6 წელია, რაც „კომედი გრუპის“ წევრი ვარ. როცა ერთ გარემოსთან წლები გაკავშირებს, შეიძლება საკუთარი თავი სხვაგან ვერც წარმოიდგინო, მაგრამ სიმართლე გითხრათ, ასე არ ვფიქრობ. სამსახური კი არა, ძვირფას ადამიანებს კარგავენ და ცხოვრებას მაინც აგრძელებენ. ვერც იმას გეტყვით, რომ იუმორისტობა ჩემი ცხოვრების ნაწილი არ არის. ახალი პერსონაჟების შექმნასა და განვითარებაზე გამუდმებით ვმუშაობ. სამსახურიდან მხოლოდ სიამოვნების მიღება არ ხდება. დამღლელიც არის და ძალიან შრომატევადიც.

  • „Honda CRV“ ჩემთვის ძალიან კომფორტულია. ზემოდან საბარგულიც კი მაქვს დადგმული და ამის გამო ზოგს ტაქსისტიც ვგონივარ, რომელიც გუდაურსა და ბაკურიანში დადის.

  • ოჯახის წევრები ხშირად მსაყვედურობენ კიდეც, სამსახურში ისე იღლები, ჩვენთან ხუმრობის დრო აღარ გრჩებაო, თუმცა მაქსიმალურად ვცდილობ, მეუღლესთან და შვილებთან მხიარული ვიყო და ყველაფერს მსუბუქად შევხედო.

  • ჩემი გოგოები, 10 წლის ელენე და 8 წლის ლილე ეკრანზე სულ უყურებენ მამას. კომედი არხზე გადაცემა „ბექა ბაიტიც“ მაქვს და არასდროს ტოვებენ.

ავტორი: სოფიო ბოჭორიძე