- ალესანდრო ცელქი ბიჭი ჩანს...
- ძალიან ცელქია, თუმცა საოცრად სტუმართმოყვარე ბიჭია. შპალერზე არ ხატავს, მაგრამ საგნების გაფუჭების მცდელობა აქვს. თუთიყუშია, ყველა სიტყვას იმეორებს. გარდერობის „დალაგებაც“ ძალიან უყვარს. როგორ ამეწყო ნაძვის ხე ისე, რომ არ დაეშალა, მეგობრები ვერსიებსაც კი მაწვდიდნენ. ერთ-ერთის მიხედვით, ნაძვის ხე გალიაში უნდა ჩამესვა, თუმცა ასეთი ზომები აღარ დამჭირდა. სანტიმ რომ დაიძინა, ბარბარობა დღეს, ნაძვის ხეც მაშინ ავაწყვე და დაშლის მცდელობა ჯერჯერობით არ აქვს.
- ახალ წელს ალესანდროს გამო რაზე გიწევთ უარის თქმა?
- სანტის დაბადებამდე ჩვენი ძირითადი საზრუნავი ის იყო, სად წავსულიყავით გასართობად. რეგიონებში დაგეგმილ კონცერტზე წასვლისგანაც არასდროს ვიკავებდი თავს, თუმცა წელს უკან დავიხიე. მიუხედავად იმისა, რომ შეიძლება, ზუსტად 12 საათზე ჩემი შვილის გვერდით ვერ ვიყო, ახალი წლის ღამეს სანტისგან მოშორებით და თან სხვა ქალაქში ვერ გავჩერდები.
- როგორ ემზადებით ახალი წლისთვის?
- საახალწლოდ ჩემი ცხოვრების ტემპი უფრო ჩქარდება. ვწერთ საახალწლო გადაცემებს, ვემზადები კონცერტებისთვის, ვფიქრობ საჩუქრებზე. გასულ წელს secret santa-ს თამაშისას მეგობრები საოცრებებს ჩავდიოდით! ახალი წლის პერიოდში ვინც უცხოეთში იყო, საჩუქარს ბორტგამცილებელსაც ვატანდით. წელს სამეგობროში მატება გვქონდა. გვანცა დარასელიასა და ტატა ხვედელიანს შვილები შეეძინათ, ამიტომ წელს ერთმანეთი დავინდეთ.
- მეუღლისგან საჩუქარი უკვე მიიღეთ?
- ერთმანეთისგან საჩუქრები ჯერ არ მიგვიღია. თუმცა 31 დეკემბრამდე ჩვენთვის მნიშვნელოვანი თარიღი - 25 დეკემბერია, როცა ერთმანეთი გავიცანით. წელს ჩვენი გაცნობის 5 წლის იუბილეა, რასაც აუცილებლად, ტრადიციულად სიურპრიზებით აღვნიშნავთ.
- საახალწლოდ სამზარეულოში ფუსფუსს თუ ახერხებთ?
- წინასაახალწლო რეჟიმის გამო სამზარეულოში ფუსფუსს ვერ ვახერხებ. ლაშას დედა იმდენ კერძს ამზადებს, ჩვენც გვიგზავნის. წელს დედაც ჩემ გვერდითაა და ის მოამზადებს ყველაფერს, თუმცა სუფრის გაწყობას ყოველთვის საკუთარ თავზე ვიღებ.