დღეს სტუმრად ვართ გენიალურ ქართველ კინორეჟისორ ელდარ შენგელაიასთან. 
ეს სახლი ადრე უფრო დიდი იყო, თუმცა ქალიშვილის, ელენე შენგელაიას ტრაგიკულად დაღუპვის შემდეგ სახლის ნაწილი გაყიდეს.
ახლა დარჩენილ ნაწილში მეუღლესთან ერთად ცხოვრობს. ნაბოლარა შვილზე მოგონებებს აქ ყველა კუთხეში შეხვდებით.
ელდარ შენგელაია გვიყვება, რომ ცხოვრებაში ყველაზე მთავარი ოჯახია, მშობლებისა და ახლობლების სიყვარულის გარეშე კი ცხოვრებაში არაფერი გამოდის. ამბობს, რომ თავად სიყვარულის გარეშე არასდროს უცხოვრია და პატრიარქის სიტყვებს გვიმეორებს: ღმერთი არის სიყვარული.
ახალგაზრდებს ურჩევს, კომპიუტერებს „მოსწყდნენ“ და წიგნების კითხვა დაიწყონ. ფიქრობს, რომ დღეს ვერაფერს მიაღწევ, თუ განათლებული არ ხარ. ადამიანი შრომისუნარიანი უნდა იყოს, ცხოვრება თავად აიწყოს და სხვის დახმარებაზე არ იფიქროს. კინორეჟისორი იმასაც აღნიშნავს, რომ ახლა საქართველოში კარგი განათლების მისაღებად სათანადო პირობები არ არის და ამ სფეროს დახვეწის აუცილებლობაზე საუბრობს. 
ვაჟა, ილია, აკაკი, იაკობ გოგებაშვილი, გალაკტიონი - ელდარ შენგელაია ახალგაზრდა თაობას, პირველ რიგში, ქართული ლიტერატურის კარგად გაცნობას ურჩევს. ამბობს, რომ ახლა საქართველოში წამბაძველობაა მოდური. კინორეჟისორი მიიჩნევს, რომ სხვა ქვეყნების წარმატებული მაგალითების გაზიარება და ათვისება კარგია, თუმცა ყველა დროში მთავარი მაინც ქართული კულტურა და ადათ-წესები უნდა იყოს.
