ჩემი სახლი „პლეხანოვიდან“ იწყება, იმ ძველი უბნიდან, სადაც ძველი სახლი იყო. იმ სახლის სული აქ, შედარებით ახალ უბანში - დიდუბეში გადმოვიტანეთ, - გვიყვება ჩვენი დღევანდელი მასპინძელი. თამრიკო ჭოხონელიძის სახლი მართლაც ძალიან საინტერესო და „ძველია“. ნივთებით, რომლებსაც სხვაგან ვერსად შეხვდებით. მსოფლიოს სხვადასხვა ქვეყნიდან სუვენირების ჩამოტანის ტრადიცია მომღერლის ბაბუისგან იწყება. ის „სუხიშვილების“ ანსამბლის პირველი თაობის წარმომადგენელი იყო და ხშირად მოგზაურობდა. უყვარდა სახლში ისეთი ნივთების ჩამოტანა, რომლებიც კონკრეტულ ქალაქს გაახსენებდა.
ტრადიცია თამრიკოს მამამაც გააგრძელა. მას მოგზაურობებიდან ჭიქები ჩამოჰქონდა იმ ქალაქებისა თუ ქვეყნების ფოტოებით, სადაც თავად იმყოფებოდა. თავად თამრიკოს კი მინიატურული ნივთები უფრო იტაცებს, ამიტომ ამ სახლში ბევრ ასეთ სუვენირს ნახავთ. თითოეულ მათგანს თავისი ისტორია აქვს.
სახლში თამრიკოსთან ერთად დედა, შვილი - მარიამ როინიშვილი და შვილიშვილი ელენე ცხოვრობენ.
ამ სახლში ხშირად არის სტუმრიანობა. თამრიკო ამბობს, რომ მისი სახლი „ჯადოსნურია“ და ადამიანებს იზიდავს. მომღერალი ურთიერთობებით არასდროს იღლება, პირიქით - ეს ყველაფერი ავსებს და ენერგიას მატებს. ყველაფერს აკეთებს იმისთვის, რომ სახლში ხშირად იყოს. მაშინაც კი, როცა სახლში მარტოა, ძალიან დიდ კომფორტსა და საოცარ აურას გრძნობს. „მიმაჩნია, რომ ქალის მშვენება სახლია. ყველაზე მართალი სწორედ სახლში ვარ“.
სამზარეულოში ხშირად ფანტაზიორობს, უყვარს სხვადასხვა კერძების მზადება. რაც შეეხება დალაგებას, ეს მისთვის რიტუალია და ამ დროს სახლში მარტო ყოფნა ურჩევნია. აღებს ყველა ფანჯარას და სახლში ბევრ სუფთა ჰაერს უშვებს. ყველა სხვა დროს თამრიკოს ხალხმრავალი სახლი უყვარს. მისი კიდევ ერთი, მართლაც ახდენილი ოცნების სახლი საგურამოში დგას - ზაფხულს სულმოუთქმელად ელოდება. ელოდება, რადგან ერთ დიდ სახლში მთელი სანათესაო იკრიბება, ოცამდე ადამიანი და ამ დროს მართლაც სიხარულის ზეიმია.