უკვე 25 წელია, ამ სახლში ცხოვრობს. ეკა ამბობს, რომ საოცრად უყვარს სტუმრები და ეს ბებიასგან გადმოეცა. ყველაზე მეტად საკუთარ თავს სწორედ ბებიას ამსგავსებს, რომელმაც შვილიშვილის აღზრდაში დიდი როლი ითამაშა.
ეკა გვიყვება, რომ მისგან განსხვავებით, ნანის სხვა ტიპის ცხოვრება ერგო. სახლიდან თითქმის სულ გასული იყო, მიუხედავად იმისა, რომ სახლში ყოფნა საოცრად უყვარს. „დედა ძალიან განიცდიდა, როცა გასტროლებზე წასვლა უწევდა. მე უფრო ხშირად ვიყავი სახლში, ახლა მეტად გავდივარ. ბავშვები გაიზარდნენ, ყველას თავისი ცხოვრება აქვს“, - ამბობს მომღერალი.
„სახლი ჩემთვის ძალიან მნიშვნელოვანია, სიმყუდროვე მიყვარს. აქ თითქმის ყველაფერი ჩემი გემოვნებით არის მოწყობილი, მე თვითონ ვცვლი ხოლმე რაღაცებს...“ - გვიყვება ჩვენი მასპინძელი, რომელსაც სამზარეულოში ტრიალი და გემრიელი კერძების მომზადებაც უყვარს. მართალია, ყოველდღე არ უწევს, თუმცა განსაკუთრებული თარიღებისთვის და სტუმრების მისაღებად საგანგებოდ ემზადება. დღესასწაულებს სახლში ხვდებიან, ეკა გვიყვება, რომ ასეთი დღეები რესტორანში, ალბათ, სულ ორჯერ თუ აღუნიშნავთ.
ახლა იდეა აქვთ, რომ სახლს დააშენონ და გააფართოონ. ეკას ნივთებიდან განსაკუთრებულად ჭურჭელი უყვარს და უკვე წლებია, სხვადასხვანაირ ჭიქებსა და თეფშებს აგროვებს. უფრო ძველ სტილს ანიჭებს უპირატესობას. ამერიკაში გადასულ შვილს ნატალია ქუთათელაძესაც კი იქაურ სახლში ასეთი ჭურჭელი და თბილი გარემო მოუწყო, რათა უცხოეთში ყოფნა არ გასჭირვებოდა.
ეკა მამალაძეს ძალიან უყვარს მცენარეები და მათი მოვლა. ლამაზ ყვავილებს ამ სახლის ყველა კუთხეში და აივანზეც აღმოაჩენთ.