გეშინია ახალი ურთიერთობის დაწყების?

ნაბიჯი 1: გააანალიზეთ წინა გამოცდილება
გაიხსენეთ, წინა ურთიერთობაში რა გტკენდათ გულს ყველაზე მეტად, რა იყო კონფლიქტების საფუძველი? ამ კითხვებზე პასუხებით სიტუაციას გვერდიდან დაინახავთ და იმასაც მიხვდებით, რეალურად რისი შიში გაქვთ. იმ შემთხვევაში კი, თუ წინა ურთიერთობა თბილი და ნათელი იყო, ჩამოწერეთ ფურცელზე ის მიზეზები, რომლებმაც ხელი შეუშალეს ურთიერთობის განვითარებას. ამით გეცოდინებათ, ახალი რომანის დროს რა არ უნდა გააკეთოთ;

ნაბიჯი 2: გახსოვდეთ, რომ გარანტია არ არსებობს და არც არასდროს იარსებებს
ვერავინ მოგცემთ გარანტიას, რომ „ამ მამაკაცს მთელი ცხოვრება უსაზღვროდ ეყვარებით, ხელის გულზე გატარებთ, ბევრი შვილი გეყოლებათ და ერთ დღეს გარდაიცვლებით“. რატომ? იმიტომ, რომ სამყარო იცვლება, გარემოებები იცვლება, ჩვენც ვიცვლებით. შეიძლება, 10 წლის შემდეგ თავადაც კი თქვათ: „ოხ, როგორ მომბეზრდი“, გაიქცეთ მისგან სადმე შორს და სხვა მამაკაცთან იპოვოთ სულიერი კომფორტი. ასეა, არა?! მოკლედ, როცა საკუთარი თავის გარანტიაც არ ვაქვს, როგორ შეიძლება, ამას სხვა ადამიანისგან ველოდოთ.  

ნაბიჯი 3: ააგეთ ლოგიკური ჯაჭვი
ადამიანის შიშის მიზეზი ხშირად ის არის, რაც შეიძლება საერთოდ არასდროს მოხდეს ან მოხდეს,თუმცა  შედეგი სულაც არ იყოს ისეთი მძაფრი, როგორი შიშიც გვაქვს. ამიტომ, ჩამოწერეთ, რისი გეშინიათ ახალ ურთიერთობაში და რა გელით, თუ თქვენი შიში გამართლდება.
აი,მაგ: გეშინიათ, რომ გიღალატებთ და გიღალატათ. რა მოხდება? ძალიან გეტკინებათ. შემდეგ რა მოხდება? დაშორდებით. შემდეგ რა მოხდება? მამაკაცების მიმართ ნდობას დაკარგავთ. შემდეგ რა მოხდება? გავა დრო, დამშვიდდებით და ახლ სიმპათიას შეხვდებით. გასაგებია პრინციპი?

ნაბიჯი 4: შეხედეთ სიტუაციას ახალი კუთხიდან
როცა ადამიანს მტკივნეული გამოცდილება აქვს მიღებული და ამის გამო ცხოვრებაში მისთვის ყვლაფერი ნეგატიურია, რა თქმა უნდა, ახალი ურთიერთობიდანაც კარგს არაფერს ელოდება. თუმცა, თუ გსურთ, ბედნიერი იყოთ, ამისთვის აუცილებლად უნდა გამოიმუშაოთ ერთი მნიშვნელოვანი უნარი - დაინახო შესაძლებლობა. ყოველი ახალი ურთიერთობაც სწორედ შესაძლებლობაა ცხოვრების უკეთესობისკენ შესაცვლელად.

ნაბიჯი 5: ენდეთ თანდათანობით
ნდობა ნებისმიერ ურთიერთობაშია საჭირო, თუმცა ძალიან რთულია, 100%-ით ენდო ადამიანს და თუ ასეთი ბრმა ნდობა არ გექნებათ, ნუ შეშინდებით. მართლაც, რა საჭიროა 100%-იანი ნდობა და თანაც გაცნობისთანავე? ნდობა ყალიბდება თანდათანობით, ამას თავად მიხვდებით და კომფორტულადაც იგრძნობთ თავს.

ნაბიჯი 6: ნუ დამალავთ, რომ გეშინიათ ახალი ურთიერთობს დაწყების 
გულწრფელად უთხარით თქვენს ახალ სიმპათიას, რომ წინა ურთიერთობის ნეგატიური გამოცდილების გამო ახალი ურთიერთობის დაწყება გიჭირთ და სთხოვეთ, რომ: „რაც არ უნდა იყოს, ერთმანეთს პატივისცემით მოვეპყრათ“. არავითარ შემთხვევაში არ ილაპარაკოთ დეტალებზე, თუ რამ გატკინათ გული წინა რომანის დროს. 

მოკლედ, თუ ახალი ურთიერთობის დაწყების შიში გაქვთ და ეს ხელს გიშლით სრულყოფილად ცხოვრებაში, მაშინ ნუ გადადებთ, დღესვე გადადგით „ნაბიჯი 1“, რადგან წინააღმდეგ შემთხვევაში „ხვალ“ არასდროს დადგება.