გიორგი გაბუნია: მიუხედავად იმისა, რომ ლიზა კალანდაძესა და დაიანა შავაძეზე ძალიან დამწყდა გული, საბოლოო ჯამში, ჩემი გადაწყვეტილებით კმაყოფილი ვარ. გრიგოლ ყიფშიძესა და თამარ ედილაშვილს ყველანაირი მონაცემი აქვთ იმისთვის, რომ ფინალამდეც მივიდნენ და გაიმარჯვონ კიდეც. მეოთხე წელია, კონკურსში ვარ ჩართული და ასეთი ბავშვები არ შემხვედრიან. ბევრჯერ გვინახავს ბავშვი, რომელიც სიმღერას პედაგოგის მითითებებით კარგად ასრულებს, მაგრამ თამარსა და გრიგოლს იმხელა თვითნაბადი მუსიკალური ნიჭი აქვთ, თვითონ იციან, როგორ უნდა შეასრულონ. თუ მოინდომებენ, შეუძლიათ, სხვებს ასწავლონ.
- ბავშვების კატეგორია რომ არ გინდოდათ, ეს ცნობილი ფაქტია. ახლა კი აშკარად ძალიან კმაყოფილი ხართ...
- ბავშვების კატეგორია რომ არ მინდოდა, ამას ყოველთვის ვამბობდი და დარწმუნებული ვიყავი, პროდიუსერები წელსაც დამინდობდნენ, არც მე გამწირავდნენ და არც მათ, მაგრამ ასე არ აღმოჩნდა. სკამების ტურამდე რომ მივედით, პროექტის ხელმძღვანელობას მადლობაც კი გადავუხადე, რომ ბავშვების კატეგორია მყავს. პატარებს სხვა თვალით შევხედე. თუ ოდესმე დავოჯახდი, ბავშვების კატეგორიის დამსახურება იქნება.
