ოთო ღურწკაია: აუტსაიდერებში რომ დავდგებოდი, ამის მოლოდინი მქონდა, რადგან ჩემი შესრულებით საკმაოდ უკმაყოფილო ვიყავი. ვერ გავაკეთე ის, რაც მინდოდა, თუმცა თავს დამნაშავედ არ ვგრძნობ, რადგან ყველაფერი გახმოვანებაზე იყო დამოკიდებული, რამაც სრული დისკომფორტი შემიქმნა.
- რომ არა გახმოვანების პრობლემა, სათანადოდ იმღერებდით?
- ძნელია ვთქვა, რომ ვიმღერებდი. ყველაფერი შეიძლება მოხდეს.... უბრალოდ, ამ შემთხვევაში კარგ შესრულებას მხოლოდ 10% ეჭირა. ყველაფერი რიგზე რომ ყოფილიყო, კარგი ნამღერი, ალბათ, 80%-ს მაინც დაიჭერდა.
- როგორ გამოიყენებთ შანსს, რომელიც „X ფაქტორმა“ მოგცათ?
- პროექტმა შანსი მომცა, რომ ხალხს შევყვარებოდი და ამას ვცდილობდი სცენაზე გამოსვლის წუთიდან. შეიძლება, ეს ემოცია გარეგნულად არ მეტყობოდა, მაგრამ სხვა მიზანი ნამდვილად არ მამოძრავებდა.
- მუსიკას თქვენი ცხოვრების რა ნაწილი უჭირავს?
- სიმღერა ჩემი ცხოვრების ის ნაწილია, რომელსაც ვერასდროს მოვიშორებ. ჩემშია შიგნით რაღაც, რაც თავს სხვანაირად მაგრძნობინებს. ბევრი ამბობს და კომენტარებშიც წერენ - „მთვრალი ხარ თუ მოწეული გაქვს?“ არც ვსვამ, არც ვეწევი და არც არასდროს მომიწევია. მუსიკით ვკაიფობ, მუსიკას ვეწევი და მუსიკით ვთვრები.
- სიმღერის გარდა, რას საქმიანობთ?
- სამედიცინო სფეროშიც ვარ დაკავებული. მომავალი ტრავმატოლოგი გახლავართ. ვესწრები ოპერაციებს და უმეტეს შემთხვევებში ჩართულიც ვარ. გარდა ამისა, ოჯახის და გვერდში მყოფი ადამიანების სიყვარულით ვარ დაკავებული. მყავს ადამიანი, ვინც მაბედნიერებს. მათთვის ვაკეთებდი ყველაფერს, რაც გამიკეთებია და მომავალშიც ვეცდები, თავი არ დავზოგო.