კონკურსის დატოვების შემდეგ მერაბ ამზოევი Funtime-ს თავის ემოციებსა და სამომავლო გეგმებზე ესაუბრა.
მერაბ ამზოევი: კონკურსი ისეთი რამაა, აუტსაიდერებში მოხვედრის მოლოდინი კი მქონდა, მაგრამ ხშირ შემთხვევაში ადამიანი მაინც კარგზე ფიქრობს ხოლმე. რაც მთავარია, „X ფაქტორში“ გამოცდილება მივიღე, გავიცანი ბევრი საინტერესო ადამიანი. მენტორთან მუშაობით ძალიან კმაყოფილი ვარ, რადგან სოფო ნიჟარაძემ ბევრი რამ მასწავლა.
- მერაბ, შთაბეჭდილება დამრჩა, რომ შესრულებისას ძალიან ნერვიულობდით...
- არ ვნერვიულობდი... უბრალოდ, შევასრულე სიმღერა, რომელიც ჩემი სტილი არ არის, თუმცა რაც არ უნდა მემღერა და როგორი შესრულებაც არ უნდა ყოფილიყო, ჩემი პროექტში დარჩენა ხალხის ხმაზე იყო დამოკიდებული. დრო მჭირდება, რომ ეს რთული პერიოდი გადავლახო. ცოლთან ერთად, ცოტა ხანს დავისვენებ და შემდეგ ისევ მუსიკას დავუბრუნდები.
