- ნიკა, მიშო სულუხიას ყოველთვის მხარს უჭერდით, მეორე ლაივზე რატომ გააკრიტიკეთ?
- წინა ტურზე იმიტომ დავიცავი, რომ შენიშვნა საკუთარი შეცდომის გამო არ დაუმსახურებია. მეორე ლაივზე კი მისი ბრალი იყო. მიშო რეპეტიციებზე არანორმალურად კარგია, ყველა მუსიკალურ სხეულს თვითონ ქმნის და ასჯერ უფრო საწყენია, როცა კონკურსზე ასეთი რამ ემართება, რადგან ის უბრალოდ მომღერალი არ გახლავთ. ძალიან მაგარი მუსიკოსია. საჭიროების შემთხვევაში, თუ ძალების მოკრებას შეძლებს, დიდი მომავალი ელის.
- გიგი ადამაშვილიც მარტის კატას შეადარეთ...
- გიგი მარტის კატისთვის არ შემიდარებია. ნამდვილად კარგი ბიჭია, მაგრამ სიმღერაში მისი კნავილები უკვე მომაბეზრებელია, რადგან ცხადი ხდება, რომ ის ერთადერთი იარაღია, რომელსაც გვთავაზობს. მეორე ლაივზე ბოლოდან მესამე ადგილზე გავიდა, რაც იმას ნიშნავს, რომ ის მაყურებელსაც არ მოსწონს.
- მალიბუსა და გიგის შეფასებების გამო სხვა მენტორებთან ყოველთვის წინააღმდეგობებს აწყდებით...
- სხვა მენტორების შეფასება მათი საქმეა. ყოველთვის იმას ვიტყვი, რასაც მე ვთვლი სწორად და საჭიროდ. სხვა მენტორებისგან განსხვავებით, ჩემს კონკურსანტებს ყოველთვის არ ვიცავ და არც სხვა კონკურსანტების წინააღმდეგი ვარ. ასე ვაპირებ მუშაობის გაგრძელებას. გიორგი ცირასთან მიმართებაში სწორად იქცევა, რასაც მალიბუზე ვერ გეტყვით. მასთან დაკავშირებით, ყველაფერში ცდება. მალიბუ სრულიად განსხვავებული ჟანრის მომღერალია და სტილი, რომელსაც მისთვის შეუსაბამო რეპერტუარში იყენებს, არ უხდება და ცუდი პროდუქტი გამოდის.