ანი მანჯავიძე: „გაჩერება არ მინდა“

ზეპირი ანკეტა

6 მარტი 20:00
610

გიორგი კეკელიძესთან პრუსტის კითხვარს პასუხობენ საქართველოს მოქალაქეები, მიუხედავად მათი წარსულისა, აწმყოსი და მომავლისა, მიუხედავად პოლიტიკური და სხვა, მსგავსი თუ არამსგავსი, შეხედულებებისა, პროფესიისა, ნიჭისა თუ... დღევანდელი სტუმარია Sofar Sounds Tbilisi-ს ბრენდმენეჯერი ანი მანჯავიძე.

- რა არის თქვენთვის სრულყოფილი ბედნიერება?
-  საკუთარ თავთან კომფორტი.


- ბოლოს როდის გაიცინეთ?
- დღეს, ძალიან ბევრჯერ. ახლაც ვიცინი.


- ბოლოს როდის იტირეთ?
- ალბათ, ერთი თვის წინ.


- თქვენი ხასიათის მთავარი შტრიხი?
- ძალიან მიზანსწრაფული ვარ.


- ყველაზე დიდი ნაკლი?
- ცოტა ზარმაცი ვარ.


- ყველაზე მეტად რომელ ისტორიულ ფიგურასთან აიგივებთ თავს?
- სასაცილოა, მაგრამ კლეოპატრასთან.


- ვინ არიან დღეს თქვენი გმირები?
- ერთადერთი გმირი ჩემთვის დედაჩემია. ეს არის ადამიანი, რომელიც ნებისმიერ სიტუაციაში ინარჩუნებს სიმშვიდეს. არის უზომოდ კეთილშობილი. ალბათ, წმინდანად შევრაცხავდი, ჩემი ნება რომ იყოს.


- თქვენი მხატვრული გმირები?
- ჩემთან ძალიან ახლოს არის ბალზაკის რაფაელი „შაგრენის ტყავიდან“.



- ყველაზე შთამბეჭდავი მოგზაურობა?

- ყველაზე შთამბეჭდავი ჩემთვის ჩემი პირველი მოგზაურობა იყო. 8 წლის ვიყავი, როდესაც ანსამბლ „ერისიონიდან“ გასტროლებზე პარიზში წავედით. ყველაზე შთამბეჭდავად მაინც ეს რჩება, რადგან პირველი იყო.


- თვისება, რომელსაც უპირატესობას ანიჭებთ მამაკაცში?
- ინტელექტი, პრინციპულობა.


- ქალში?
- ქალშიც ანალოგიურად. საერთოდ, არ მიყვარს სექსიზმი.


- საყვარელი მწერლები?
- პირველი, ვინც ახლა თავში მომივიდა - რიუნოსკე აკუტაგავა და კობო აბე.


- საყვარელი კომპოზიტორი?
- ძალიან მიჭირს გამორჩევა. ალბათ, უფრო ნილს ფრამი.


- ფილმი?
- საყვარელი ფილმია ტომ ტიკვერის, ენდი ვაჩოვსკის და ლანა ვაჩოვსკის „ღრუბლის ატლასი“.



- რას მიიჩნევთ თქვენს ყველაზე დიდ მიღწევად?

- არაფერს... თუკი რამეს მივიჩნევ ჩემს ყველაზე დიდ მიღწევად, მაშინ გავჩერდები და გაჩერება არ მინდა. ჯერჯერობით, არაფერი. ალბათ, ეს სიკვდილის წინ უნდა მკითხო.


- რა არის თქვენთვის ყველაზე ძვირფასი?
- დრო, რომელიც ძალიან სწრაფად გადის.


- თარიღი, რომელსაც თქვენი ცხოვრებიდან გამოტოვებდით?
- არაფერს გამოვტოვებდი. თარიღებით შედგება მთელი ჩემი ცხოვრება.


- რა არის თქვენთვის სამშობლო?
- შეიძლება, არაპატრიოტულად გამომივიდეს, მაგრამ სამშობლო არის ადგილი, სადაც ვცხოვრობ, სადაც არიან ჩემი ახლობლები, მეგობრები და ეს სრულიად არ გამორიცხავს, რომ რამდენიმე წლის შემდეგ ჩემი სამშობლო იყოს, მაგალითად, ინდოეთი.


- რისი გეშინიათ ყველაზე მეტად?
- მარტოობის.


- როგორ ისურვებდით სიკვდილს?
- არ ვისურვებდი სიკვდილს და, ჩემი თეორიით, არც ვკვდები. უბრალოდ, ვარ ენერგია, რომელიც რაღაც ცირკულაციას განიცდის და წინ მივდივარ. ეს არის სურვილი და როდესაც ადამიანს რაღაცის სწამს, ეს უკეთესია.


- თუკი ოდესმე ღმერთს შეხვდებოდით, რას ისურვებდით, რომ თქვენთვის ეთქვა?
- რომ ცხოვრება არასდროს მთავრდება და გრძელდება ისეთი ფორმით, როგორიც მე მინდა.