- რა არის თქვენთვის სრულყოფილი ბედნიერება?
- ჩემთვის და, ალბათ, ზოგადადაც, სრულყოფილი ბედნიერება არ არსებობს, თუმცა, ორი სიტყვით თუ ვიტყვი, შესაძლოა, ეს საყვარელი ადამიანების გარემოცვაში ყოფნა იყოს.
- ბოლოს როდის გაიცინეთ?
- ხშირად ვიღიმი. აი, ამ წამს გავიღიმე.
- ბოლოს როდის იტირეთ?
- ძალიან ემოციური ვარ. შესაბამისად, ჩემთვის ტირილიც ძალიან მარტივია. რამდენიმე საათის წინ ვიტირე.
- თქვენი ხასიათის მთავარი შტრიხი?
- ხასიათის სიმტკიცე.
- ყველაზე დიდი ნაკლი?
- ემოციების მართვა არ ვიცი და ვცდილობ, ვისწავლო.
- ყველაზე მეტად რომელ ისტორიულ ფიგურასთან აიგივებთ თავს?
- იცით რაა, ალბათ, არავისთან გავაიგივებდი.
- ვინ არიან თქვენი გმირები დღეს?
- დღეს ჩემი გმირები არიან მარტოხელა დედები და ის ადამიანები, ვინც უანგაროდ აკეთებენ სიკეთეს.
- თქვენი მხატვრული გმირები?
- არ მყავს მხატვრული გმირები.
- ყველაზე შთამბეჭდავი მოგზაურობა?
- ის მოგზაურობა, რომელიც გულით მინდა, ვფიქრობ, ჯერ წინ მაქვს.
- თვისება, რომელსაც უპირატესობას ანიჭებთ მამაკაცში?
- მამაკაცურობა, ხასიათის სიძლიერე და იუმორის გრძნობა.
- ქალში?
- საკუთარი თავის პატივისცემა.
- საყვარელი მწერლები?
- ვაჟა ფშაველა მიყვარს ძალიან და უილიამ შექსპირი.
- საყვარელი კომპოზიტორი?
- ძალიან მიყვარს ლუდვიგ ვან ბეთჰოვენი. პინკ ფლოიდიდან - როჯერ უოტერსი და ბითლზებიდან - ჯორჯ ჰარისონი.
- ფილმი?
- კრისტოფერ გარნერის „ბედნიერების კვალდაკვალ“, რომელიც ძალიან ღრმა ფილმია.
- რას მიიჩნევთ თქვენს ყველაზე დიდ მიღწევად?
- ჩემს შვილს.
- რა არის თქვენთვის ყველაზე ძვირფასი?
- ჩემი შვილი.
- თარიღი, რომელსაც თქვენი ცხოვრებიდან გამოტოვებდით?
- დიახ, ასეთი არსებობს: 22 ივნისი.
- რა არის თქვენთვის სამშობლო?
- კულტურა.
- რისი გეშინიათ ყველაზე მეტად?
- საყვარელი ადამიანების დაკარგვის.
- როგორ ისურვებდით სიკვდილს?
- ვუსურვებდი იმ ეტაპზე, როცა ვიტყვი, რომ გავაკეთე რაღაც ისეთი, რაც ჩემს შვილს დავუტოვე. ვისურვებდი გაცნობიერებულად სიკვდილს. მეძინოს და ძილში გავიპარო, ეგ არ მინდა.
- თუკი ოდესმე ღმერთს შეხვდებოდით, რას ისურვებდით, რომ თქვენთვის ეთქვა?
- „ო, ლანკა, გამოგივიდა“.
