- რა არის თქვენთვის სრულყოფილი ბედნიერება?
- ალბათ, ყველა ცოცხალი არსების თავდაპირველი არსი.
- ბოლოს როდის გაიცინეთ?
- წეღან... ახლაც ვიცინი.
- ბოლოს როდის იტირეთ?
- გუშინ, რეპეტიციაზე.
- თქვენი ხასიათის მთავარი შტრიხი?
- ძლიერი ვარ!
- ყველაზე დიდი ნაკლი?
- ალბათ, მაქსიმალიზმი.
- ყველაზე მეტად რომელ ისტორიულ ფიგურასთან აიგივებთ თავს?
- უინსტონ ჩერჩილთან.
- ვინ არიან თქვენი გმირები დღეს?
- ადამიანები, რომლებიც ახერხებენ, მყარი ღირებულებითი სისტემა ჰქონდეთ და ამავდროულად ახერხებენ, შეინარჩუნონ ადეკვატურობა თანამედროვე რეალობასთან.
- თქვენი მხატვრული გმირები?
- თოლია ჯონათან ლივინგსტონი და მგელი აკელა.
- ყველაზე შთამბეჭდავი მოგზაურობა?
- საკუთარ თავში. ერთი კონკრეტული, ძალიან საინტერესო გამოცდილება მქონდა.
- თვისება, რომელსაც უპირატესობას ანიჭებთ მამაკაცში?
- ემოციური ინტელექტი.
- ქალში?
- ქალშიც, იგივე.
- საყვარელი მწერლები?
- ორსულობის დროს ყოველთვის შემიძლია ვიკითხო ერნსტ ჰემინგუეი.
- საყვარელი კომპოზიტორი?
- იოჰან სებასტიან ბახი.
- ფილმი?
- „გზამკვლევი გალაქტიკაში ავტოსტოპით მოგზაურთათვის“.
- თარიღი, რომელსაც თქვენი ცხოვრებიდან გამოტოვებდით.
- არაფერს გამოვტოვებდი. კარგს არ გამოვტოვებ. ცუდი - განვითარებისთვის არის საჭირო. რაღაცებს ჩავანაცვლებდი, რაც უაზროდ გავატარე.
- რას მიიჩნევთ თქვენს ყველაზე დიდ მიღწევად?
- ალბათ, იმას, რომ სოციოფობია დავამარცხე და ადამიანები შემიყვარდა.
- რა არის თქვენთვის ყველაზე ძვირფასი?
- მშვიდობა და ყველა გარშემომყოფის ბედნიერება. პირველ რიგში, ჩემი შვილების მაინც და მშობლების.
- რა არის თქვენთვის სამშობლო?
- ბავშვობა.
- რისი გეშინიათ ყველაზე მეტად?
- მასობრივი უბედურების.
- როგორ ისურვებდით სიკვდილს?
- ისე, რომ გააზრება მოვასწრო, მაგრამ არ ვიტანჯო.
- თუკი ოდესმე შეხვდებოდით ღმერთს, რას ისურვებდით, რომ თქვენთვის ეთქვა?
- მიყვარხარ, მიუხედავად ყველაფრისა. ჩემი ცოდნა - შენი ცოდნაა.
ფოტოგრაფი: ალექსანდრე სხულუხია