- რა არის თქვენთვის სრულყოფილი ბედნიერება?
- ბედნიერებას ზუსტი დეფინიცია არ აქვს. მგონია, ბედნიერება კონკრეტულ მომენტში განცდილი შინაგანი კმაყოფილებაა. ყველაზე ხანგრძლივი პერიოდით კი ეს, ალბათ, უფრო ბავშვობაშია, როდესაც არ იცი, რა არის უბედურება.
- ბოლოს როდის გაიცინეთ?
- ახლა (იცინის).
- ბოლოს როდის იტირეთ?
- რამდენიმე დღის წინ.
- თქვენი ხასიათის მთავარი შტრიხი?
- ემოციურობა, გულწრფელობა და სიჯიუტე.
- ყველაზე დიდი ნაკლი?
- სიჯიუტე საკუთარ თავთან.
- ყველაზე მეტად რომელ ისტორიულ ფიგურასთან აიგივებთ თავს?
- ზოგადად, არ მიყვარს საკუთარი თავის შედარება სხვებთან. ამ ეტაპზე ვერც ერთ ისტორიულ გმირთან ვერ გავაიგივებ თავს.
- ვინ არიან თქვენი გმირები დღეს?
- ყველა ის ადამიანი, ვისაც მიზანი აქვს და ამ მიზნის მისაღწევად ბოლომდე იბრძვის, მიუხედავად ბევრი წინაღობისა.
- თქვენი მხატვრული გმირები?
- ნოდარ დუმბაძის გოგონა მარადიული ფერების პლანეტიდან, სახელად მონატრება.
- ყველაზე შთამბეჭდავი მოგზაურობა?
- ორთვიანი არქეოლოგიური ექსპედიცია ბულგარეთში.
- თვისება, რომელსაც უპირატესობას ანიჭებთ მამაკაცში?
- ოტია იოსელიანს აქვს ნათქვამი: „მილიარდობით ტვინის უჯრედი აქვს კაცს, თუ არ განავითარე, რად გინდა მერე? აკოტრიალე ეს თავი აქეთ-იქით, გამოვა რამე?“ ვფიქრობ, მამაკაცი უნდა იყოს ძლიერი ფიზიკურად, სულიერად და გონებრივად.
- ქალში?
- „დუმილის დროსაც მუდამ რაღაცას უნდა ამბობდეს ნამდვილი ქალი...“
დავეთანხმები გურამ დოჩანაშვილის სიტყვებს.
- საყვარელი მწერლები?
- პერიოდებისა და განწყობა-შეხედულებების მიხედვით, საყვარელი მწერლები მეცვლება. ამ ეტაპზე გამოვარჩევდი გურამ დოჩანაშვილს.
- საყვარელი კომპოზიტორი?
- გია ყანჩელი.
- ფილმი?
- ანდრეი ტარკოვსკის „სტალკერი“; ალფრედ ჰიჩკოკის „ფანჯარა ეზოს მხარეს“ და „ჩიტები“.
- რას მიიჩნევთ თქვენს ყველაზე დიდ მიღწევად?
- შევინარჩუნო საკუთარი მე და არ გავხდე სხვა.
- რა არის თქვენთვის ყველაზე ძვირფასი?
- გულწრფელი ურთიერთობები.
- თარიღი, რომელსაც თქვენი ცხოვრებიდან გამოტოვებდით?
- არც ერთს, ცუდიც და კარგიც, ალბათ, მოსახდენი იყო, რადგან ყველაფერი უკეთესობისკენ არის მიმართული.
- რა არის თქვენთვის სამშობლო?
- წარსული, აწმყო და მომავალი.
- რისი გეშინიათ ყველაზე მეტად?
- თვითონ შიშის. როდესაც ეს გრძნობა გიპყრობს, მერე უკვე ძალიან ბევრი რამის გეშინია.
- როგორ ისურვებდით სიკვდილს?
- არ მიფიქრია, თუმცა ყოფილა შემთხვევები, როდესაც მითქვამს: ახლა თუგინდ მოვკვდე. ეს ის მომენტებია, როდესაც ბედნიერებისა და სიხარულისგან ეიფორიაში მყოფი სიკვდილზეც თანახმა ხარ.
- თუკი ოდესმე ღმერთს შეხვდებოდით, რას ისურვებდით, რომ თქვენთვის ეთქვა?
- ყველა ის ქმედება და ნაბიჯი, რაც გულით მოვიმოქმედე, მართალი იყო.