ახალმა მერმა პირველი სამუშაო დღე, თვითმმართველობის თანამშრომლებთან შეხვედრით დაიწყო, სადაც დამსწრეებს სამომავლო გეგმებზე ესაუბრა და წარმატებები უსურვა.
მერთან შეხვედრას, ასევე ესწრებოდნენ პარლამენტის დეპუტატები თამაზ ნავერიანი, რუსლან გაჯიევი და საკრებულოს წევრი ამირან გიორგაძე.
„მიმაჩნია, რომ თითოეული პროფესიონალი და მოტივირებული თანამშრომელი ერთ-ერთი მნიშვნელოვანი ფაქტორია მერიის წარმატებით მუშაობისთვის, რაც, საერთო ჯამში, მუნიციპალიტეტის განვითარებაზე აისახება. ჩვენ ვიქნებით აქტიურ სამუშაო რეჟიმში, რათა ყველა ის დაპირება, რომელიც წინა საარჩევნო პერიოდში გავეცით, ერთად განვახორციელოთ, მოვაგვაროთ მოსახლეობის პრობლემები, მარნეული გავხადოთ მეტად მიმზიდველი და წარმატებული მუნიციპალიტეტი, ვიდრე დღეს არის. ჩვენ ერთი დიდი გუნდი ვართ და მჯერა, რომ ერთიანი ძალისხმევით ბევრ სასიკეთო საქმეს გავაკეთებთ ჩვენი ხალხისა და ქვეყნისათვის", - განაცხდა შეხვედრაზე თემურ აბაზოვმა.
თანამშრომლებთან შეხვედრის შემდგომ თემურ აბაზოვმა მერიის შენობა დაათვალიერა და მოქალაქეებიც მიიღო.