Summer Set 2019-ზე მოსულ სტუმრებს დახვდებათ:
3 მუსიკალური სცენა ორ სხვადასხვა ლოკაციაზე;
50-მდე არტისტის მოსმენას სტუმრები 24 საათის განმავლობაში შეძლებენ;
დღის სცენის ღონისძიებებზე დასწრება იქნება უფასო;
წარმოდგენილი იქნება სპორტის 9 სხვადასხვა სახეობა;
ფესტივალზე მოსული სტუმრები შეძლებენ დარჩნენ როგორც სასტუმროებში, ჰოსტელებში, ისე კარვებში.
ამ მომენტისთვის ფესტივალის Line Up-ის მხოლოდ 20%-ია ცნობილი, ფესტივალის პირველი ჰედლაინერები არიან: WhoMadeWho, Henri Saiz and Band, Mathew Jonson, DMX Krew.
დღის სცენა ზღვის დონიდან 2734 მეტრზე, მეორე საბაგიროს ბოლოში, ხოლო ღამის სცენა სასტუმრო “მარკო პოლოს” კორტების ტერიტორიაზე მოეწყობა. “Summer Set-ის გუდაურში გადატანა სიცხისგან, ქალაქის ხმაურისგან მოწყვეტის, დარესტარტების საშუალებას მოგვცემს”,-ამბობს ფესტივალის PR მენეჯერი ნიკა დვალიძე.
Gudauri Summer Set წელსაც პლატფორმად რჩება ახალბედა არტისტებისთვის, სტარტ აპერებისა და იმ არტისტებისთვის, ვისაც თვითგამოხატვისთვის სივრცე და პუბლიკა ესაჭიროება. ფესტივალი ასევე ხელს უწყობს გუდაურის ეკონომიკურ განვითარებას და კურორტს ტურისტებისთვის ზაფხულშიც მიმზიდველს ხდის.
Summer Set პირველად 2012 წელს ბათუმში ჩატარდა და შემდეგ თბილისში გადმოინაცვლა, ყოველ წელს ფესტივალს 5-დან 15 000-მდე მელომანი ესწრება, 2018 წლიდან ფესტივალმა ფორმატი შეიცვალა და ელექტრონულ მუსიკას ინსტრუმენტული ჟღერადობის მქონე არტისტები დაუმატა.
დღეს Summer Set ჰიბრიდული მოდელის ფესტივალია, რომელიც ეხმაურება თანამედროვე საერთაშორისო სტანდარტებს და პრიორიტეტს მუსიკასთან ერთად ჯანსაღი ცხოვრების წესს და მთას ანიჭებს.