რიტუალში მრევლიც მონაწილეობს. როგორც ეპარქიაში განმარტავენ, ქუჩების კურთხევა ვირუსთან ბრძოლის წინააღმდეგ ხდება.
რაც შეეხება ზიარებისა და მრევლის შეკრების წესის შეცვლას, ეპარქიაში ამბობენ, რომ წესები დროთა განმავლობაში იცვლება, თუმცა მთავარია მოტივი და თუ იქნება ამის საჭიროება, წესების შეცვლა იქნება გამართლებული.
ბათუმისა და ლაზეთის ეპარქიის პრეს-სპიკერის, დეკანოზ იოანე გორელიშვილის თქმით, სინოდის სხდომაზე - აღდგომის დღესასწაულზე მრევლის შეკრების საკითხზეც იმსჯელებენ.
"უმთავრესი საკითხი ეს იქნება, როგორ დახვდება ეკლესია ამ ვირუსს. ისტორიაში ყოფილა უფრო რთული ვირუსებიც. ისინი გადახედავენ ისტორიას, გადახედავენ საეკლესიო სამართალს, დოგმატიკას და იმისდა მიხედვით გადაწყვეტენ.
მთავარია ჩვენ ვიცოდეთ, რა არის მოტივაცია, რატომ უნდა შეიცვალოს ზიარების წესი, ან რატომ არ უნდა შეიცვალოს. ეს არის ყველაზე მნიშვნელოვანი. ზოგადად, წესები დროთა განმავლობაში იცვლებოდა და შეიძლება კიდევაც, რომ შეიცვალოს, მაგრამ მთავარი არის, რომ იყოს მოტივაცია სწორი. თუ მოტივაცია იქნება სწორი, რა თქმა უნდა, ამ შემთხვევაში ქმედება იქნება გამართლებული. არის თუ არა საკმარისი მოტივაცია, ამასთან დაკავშირებით სინოდი იმსჯელებს", – განაცხადა დეკანოზმა იოანე გორელიშვილმა.
