მამუკა ღლონტის სამ შვილთან ერთად, წლისა და შვიდი თვის სესილიც დაგვხვდა, რომელიც ბატონი მამუკას პირველი შვილიშვილია.
- რამდენი წლის იყავით, მამა რომ გახდით?
- პირველი შვილი 23 წლის ასაკში შემეძინა. ახლა სამი ქალიშვილის მამა ვარ. ყველაზე უფროსია თამარ ღლონტი, რომელიც 27 წლისაა, მომდევნო - ეკა, 25 წლის და სოფო - 22 წლის. ჩემი შვილიშვილი სესილი ავალიანი წლისა და შვიდი თვისაა.
- რით განსხვავდება მამობის გრძნობა ბაბუობისგან?
- როცა ახალგაზრდა ხარ და თან მამა, სხვა ქიმია გაქვს და ვერ ხვდები მთელ იმ კაიფს, რასაც შვილი ჰქვია. როცა შვილიშვილი ჩნდება, უკვე დაღვინებული ხარ, ბრუნდები იმ ახალგაზრდობაში და მთელი იმ სიამოვნებით, რაც შვილს და, საერთოდ, ბავშვს აქვს, ბოლომდე ივსები. აღარ ტოვებ იმ მომენტებს, რასაც ახალგაზრდობაში თავისუფლად ტოვებ. როდესაც ტელევიზიაში ვმუშაობდი, მუდმივად ბევრი საქმე მქონდა. ყოფილა შემთხვევა, ზედიზედ 3 დღე სამსახურში ვყოფილვარ. ამის გამო ჩემი შვილების ცხოვრების ბევრი ეტაპი გამოვტოვე. ახლა ამ ყველაფერს შვილიშვილთან ვინაზღაურებ. მთელ დროს მასთან ვატარებ.
- რამდენად კრიტიკული იყავით თქვენი შვილების მიმართ?
- კრიტიკული არასდროს ვყოფილვარ. ძალიან ლიბერალური მამა ვიყავი და ვარ. ჩემი შვილებისთვის ხმამაღალი სიტყვა არასდროს მითქვამს, არასდროს მიმითითებია იმაზე, სად ჩაებარებინათ და რა პროფესია აერჩიათ, როგორც ქართულ ტრადიციულ ოჯახებში ხდება ხოლმე. ერთადერთი - წიგნის კითხვას მივაჩვიე და დანარჩენი, რჩევებს ვაძლევდი. თუ გაითვალისწინებდნენ, ხომ კარგი, თუ არადა, წაქცევაც და ცხვირის წატეხაც ასწავლის ადამიანს ჭკუას.
- როგორი გინდათ იყოს მომავალი თაობა, თქვენი შვილიშვილის თაობა?
- აუცილებლად მინდა, მომავალმა თაობამ მეტი იკითხოს. განათლებულობა და ნაკითხობა ყველაფრის თავი და თავია. სხვათა შორის, სესილისთვის წიგნს ყოველ მესამე, მეოთხე დღეს ვყიდულობთ. გიჟდება, ისე უყვარს წიგნები - იძინებს წიგნთან ერთად და იღვიძებს წიგნთან ერთად. ბავშვობიდან ვაჩვევთ, რომ ბევრი უნდა იკითხოს.