ყოფილი რკინიგზელთა სახლი, ამჟამად საქართველოს ეროვნული მუსიკალური ცენტრის შენობა
აგებულია 1950 წელს. ნაგებობის ავტორია თბილისელი არქიტექტორი გაბრიელ ტერ-მიქელოვი (მისივე აგებულია რუსთაველის პროსპექტზე ყოფილი სასტუმრო „Hôtel Majestic“, ამჟამად - სასტუმრო „თბილისი მარიოტი“). მუსიკალური ცენტრის წინ მცირე მოედანზე ცნობილი ქართველი ხელოვანის ჯანო ბაგრატიონის ბიუსტი დგას. ნაგებობის გვერდით მდებარეობს ყოფილ „გოფილექტის“ ბაღში შესასვლელი. ეს ბაღი, რომელსაც სახელწოდება დაერქვა „გოსუდარსტვენნაია ფილარმონიადან“, XX საუკუნეში თბილისელთა საყვარელი დასასვენებელი ადგილი იყო, სადაც ზაფხულის სეზონზე ღია ცის ქვეშ კონცერტები იმართებოდა.
კინოთეატრი „რუსთაველი“
ამ ადგილას 1820-იან წლებში ჰაუპტვახტის შენობა იდგა, რომელიც 1917 წლის რევოლუციამდე უდისციპლინო ჯარისკაცებისთვის იყო განკუთვნილი. იქვე იყო კალოუბნის წმ. გიორგის სახელობის ეკლესია. 1936 წელს, ბერიას ინიციატივით, ეკლესია და ჰაუპტვახტი დაანგრიეს და 4-სართულიანი კინოთეატრი ააშენეს. „რუსთაველი“ 1939 წლის 26 თებერვალს გაიხსნა.
რუსთაველის პროსპექტი. ლაღიძის წყლების შენობა
ეს შენობა XIX საუკუნის ბოლოს აიგო. შენობა ვინმე სტეპანოვს ეკუთვნოდა. იმ პერიოდში ტფილისში ძალიან მომრავლდა ევროპული ყაიდის სასტუმროები და ამ შენობაშიც სასტუმრო „მეტროპოლი“ მდებარეობდა. მაშინ მისი მისამართი იყო ალექსეი კრუზენშტერნის #4. სასტუმრო XX საუკუნის დასაწყისში დაიხურა. 1906 წელს შენობის პირველ სართულზე მიტროფანე ლაღიძემ გახსნა თავისი ცნობილი მაღაზია - „ლაღიძის წყლები“. 1990 წელს ქუჩას მ. ლაღიძის სახელი უწოდეს.
„ოფიცერთა სახლი“
„ოფიცერთა სახლის“ სახელით ცნობილი შენობა შოთა რუსთაველის გამზირის ერთ-ერთი მნიშვნელოვანი ნაგებობაა. ის რუსთაველის გამზირისა და ბესიკის ქუჩის კუთხეში მდებარეობს. დიდი ზომის სამსართულიანი ნაგებობა 1916 წელს აშენდა ცნობილი არქიტექტორის დავით ჩისლიევის პროექტით (ამავე ავტორს ეკუთვნის რუსთაველის გამზირზე აგებული „ზარია ვოსტოკას“ შენობა).
თავდაპირველად შენობაში თბილისის საარტისტო წრე - „ტფილისის კრუჟოკი“ იყო განთავსებული, სარდაფში კი - არტისტული კაფე „არგონავტთა ნავი“. კაფე XX საუკუნის ცნობილმა მხატვრებმა - კირილე ზდანევიჩმა, ლადო გუდიაშვილმა და ალექსანდრე ბაჟბეუქ-მელიქოვმა მოხატეს. ამჟამად ფრესკების მხოლოდ რამდენიმე ფრაგმენტია შემორჩენილი. განსაკუთრებულია კუთხის ფასადი. ორ სართულად განლაგებული ლოჯიები მძლავრი სვეტებითა და კარიატიდებით იქცევს ყურადღებას. აღსანიშნავია, რომ კარიატიდები (შენობის კოჭების საყრდენი ქალის ქანდაკებები) გამოჩენილი ქართველი მოქანდაკის იაკობ ნიკოლაძის შესრულებულია.
კინოსტუდიის შენობა
აგებულია 1930 წელს. შენობის ავტორია ქართველი არქიტექტორი და პედაგოგი მიხეილ ბუზოღლი (დაიბადა1879 წ. სოხუმში). კინოსტუდიას 1923 წლიდან საქართველოს „სახკინმრეწვი“ (Госкинпром) ეწოდებოდა. თბილისელების ძველი თაობა ამ ტერიტორიას დღემდე „გოსკიმპრომად“ მოიხსენიებს. 1953 წლიდან კი ამჟამინდელი სახელი - „ქართული ფილმი“ ეწოდა.