სტიქია ცეცხლი: ვერძი, ლომი, მშვილდოსანი
ცეცხლის სტიქიის ქვეშ ფეთქებადი, გამორჩეულად ენერგიული და ნოვატორული აზროვნების მქონე ნატურები იბადებიან.
თავისუფლებისმოყვარეებსა და ამაყებს, განსაკუთრებული პიროვნული შარმი და მომხიბვლელობა აქვთ.
მათ შორის ბევრი თავისი სფეროს პირველაღმომჩენი და პიონერი გვხვდება, ცეცხლის სტიქიას უამრავი ცნობილი პოლიტიკოსი, მომღერალი, მსახიობი, საზოგადო მოღვაწე განეკუთვნება.
სამწუხაროდ, უკიდურესობებით აღსავსე ბუნება, ზოგჯერ მათ არა მარტო სამართლიანობისთვის მებრძოლი რევოლუციონერის, არამედ დიქტატორისა და სადისტის ხასიათსაც უყალიბებს.
სტიქია წყალი: კირჩხიბი, მორიელი, თევზები
ემოციური, ძალზე მგრძნობიარე ნატურები. აქვთ საოცრად განვითარებული ინტუიცია, ადამიანთა გამჭოლი ხედვისა და გარდასახვის შესანიშნავი უნარი.
მათ შორის ბევრი ფსიქოლოგი, მედიუმი, ასტროლოგი, პარაფსიქოლოგი გვხვდება.
ისინი კარგად ეწყობიან, ასევე, ხელოვნების სხვადასხვა სფეროს: თეატრს, კინოხელოვნებას, მხატვრობას, მუსიკას და ა.შ.
არიან ფრთხილები და დაკვირვებულები. შეუძლიათ, იყონ კარგი ფინანსისტები, მხედართმთავრები, ღვთისმსახურები.
ამ სტიქიის ადამიანებში, მათი კაცთმოყვარე ბუნებიდან გამომდინარე, ბევრი ქველმოქმედი და მეცენატიც გვხვდება.
სტიქია მიწა: კურო, ქალწული, თხის რქა
გაწონასწორებული, სტაბილური და რეალისტი ადამიანების სტიქიაა, ამ სტიქიის წარმომადგენლები მიწაზე მართლაც, რომ ყოველთვის მყარად დგანან.
მათ უმრავლესობას მატერიალური დოვლათის დაგროვებისა და ფულის შოვნის შესაშური ნიჭი აქვს.
საქვეყნოდ ცნობილი ფინანსისტები, ბიზნესმენები და ბანკირები სწორედ ამ სტიქიით იბადებიან.
ანალიტიკური აზროვნების უნარისა და დაკვირვებულობის წყალობით, მათ შორის ბევრი მეცნიერიც გვხვდება.
გარდა ამისა, მიწის სტიქიით დაბადებული ადამიანებისგან გონიერი, ფრთხილი და წინდახედული პოლიტიკოსები და მმართველებიც გამოდიან.
სტიქია ჰაერი: ტყუპი, სასწორი, მერწყული
კომუნიკაბელური, გამჭრიახი გონებით დაჯილდოებული, კონტაქტური, მრავალმხრივი ნიჭის მქონე ადამიანები.
ისინი ყველგან არიან, სადაც ლაპარაკი, მსჯელობა, კამათია საჭირო. ქმედითი და მოუსვენარი ნატურები არიან. თუმცა მერყევები და რამდენადმე არასტაბილურები. ხშირად იცვლიან ინტერესების სფეროს, მისწრაფებებსა და იდეალებს.
უყურებენ ყველაფერს გამომგონებლის თვალით და ცდილობენ, ნებისმიერ სფეროში ნოვატორული იდეები დანერგონ.
მათ შორის ბევრი ლიტერატორი, შოუმენი, დიპლომატი, ორატორი და პოლიტიკური მოღვაწე გვხვდება.