ცნობილია, რომ მსახიობი ელიზაბეტ ტეილორი ხელიდან არ იშორებდა საყვარელი მეუღლის - რიჩარდ ბარტონის ნაჩუქარ ბეჭედს, რომელსაც 33,19-კარატიანი კრუპის ბრილიანტი ამშვენებდა.
მეოცე საუკუნის დასაწყისში ეს ბრილიანტი ფაშისტური გერმანიისთვის იარაღის მიმწოდებლისა და უმსხვილესი მეწარმის - ალფრედ კრუპის ცოლს ეკუთვნოდა. ბარტონმა ძვირფასი ქვა 1968 წელს აუქციონზე 307 000 დოლარად შეიძინა.
„ჩემს ბეჭედს სილამაზის განსაცვიფრებელი შეგრძნება მოაქვს. მისი სხივები ხან ალისფერია, ხან - თეთრი, ხან - ცისფერი... როგორც ხმა, მისი ღვთაებრივი ცხოვრებიდან“, - ამბობდა ტეილორი თავის ბრილიანტზე.
ისე მოხდა, რომ ლოს-ანჯელესში ყოფნის დროს, დიდი ბრიტანეთის სამეფო ოჯახის წევრსა და დედოფალ ელისაბედ მეორის უმცროს დას, პრინცესა მარგარეტს „ჰოლივუდის დედოფალი“ გააცნეს.
პრინცესამ ინტერესით შეათვალიერა მსახიობის ხელი, რომელსაც ბარტონის ნაჩუქარი ბეჭედი ამშვენებდა და მოულოდნელად მას ვულგარული სამკაული უწოდა.
ისე, რომ წყენა არ შეუმჩნევია, ელიზაბეტ ტეილორმა მარგარეტს ბეჭდის მოსინჯვა შესთავაზა.
როცა პრინცესამ სამკაული თითზე მოირგო, აღფრთოვანების დამალვა გაუჭირდა. მსახიობმა მას ცბიერი ღიმილით შეხედა და გესლიანად ჰკითხა, როცა თქვენს ხელს ამშვენებს, ისე ვულგარული აღარ ჩანს, არა?
სიკვდილამდე ცოტა ხნით ადრე, ელიზაბეტ ტეილორმა თავისი სამკაული კიდევ ერთხელ ახსენა: „კრუპი ექსტრაორდინარული ქვაა. მასში საოცარი სიცოცხლე ირეკლება. ზომის გარდა, მნიშვნელოვანია ემოციის ძალა, რომელსაც ის იწვევს“.
