აკრონის უნივერსიტეტის მედიკოსებმა შექმნეს უნიკალური საკონტაქტო ლინზები, რომლებსაც სისხლში შაქრის შემცველობის მიხედვით ფერის შეცვლა შეუძლიათ. ლინზებში შემავალი სპეციალური ნივთიერება ქიმიურ რეაქციაში შედის გლუკოზასთან, რომელსაც ცრემლის მაგვარი სითხე შეიცავს და ლინზებს ფერს უცვლის.
აკრონის უნივერსიტეტის დოქტორის ცზიუნ ჰუს განმარტებით, სისტემა ლაკმუსის ქაღალდის პრინციპით მუშაობს, თუმცა ლინზების მატარებელი ადამიანი თვალის ფერის ცვლილებას სარკეში ჩახედვამდე ვერ იგრძნობს. ამის გათვალისწინებით, მეცნიერებმა შეიმუშავეს დანართი სმარტფონებისთვის, რომელიც თვალის ფოტოს მიხედვით, სისხლში გლუკოზის რაოდენობას დაადგენს.
„გლუკოზის მიმართ მგრძნობელობა მხოლოდ ერთ ლინზას აქვს. მეორე ფერს არ იცვლის, რაც საშუალებას გვაძლევს, საკონტროლოდ გამოვიყენოთ. სწორედ თვალების ფერს შორის განსხვავება გვაძლევს საშუალებას, სისხლში შაქრის შემცველობა დავადგინოთ“, - განმარტავს დოქტორი, რომელმაც თავისი იდეა 2011 წელს დააპატენტა.
„საცრემლე ჯირკვლებში წარმოქმნილი სითხის საშუალებით გლუკოზის დონის დადგენა შესაძლებელია როგორც პერიოდული, ასევე მუდმივი კონტროლისთვის. ამასთანავე, ახალი მეთოდი სისხლის პირდაპირ ანალიზზე ნაკლებ ეფექტური არ არის - აღნიშნავენ მკვლევარები. რაც მთავარია, ლინზების სიმარტივე და მოხერხებულობა პაციენტის მოტივაციას - ხშირად აკონტროლოს სისხლში შაქრის შემცველობა, ზრდის, რაც კრიტიკულად მნიშვნელოვანია დიაბეტით დაავადებული ადამიანისთვის.
დღის განმავლობაში შაქრის დონე სწრაფად იცვლება, ასე რომ მეთოდი, რომელიც მთელი დღის განმავლობაში გლუკოზის დონის კონტროლში ეხმარება, დიაბეტით დაავადებული ადამიანებისთვის იდეალური დამხმარე იქნება.