კომპანია VERSTAS-ის არქიტექტორებმა და დიზაინერებმა, რომლებიც სკოლის შენობაზე მუშაობდნენ, გადაწყვიტეს, რომ საკლასო ოთახებად დაყოფილი სკოლა უფრო საპატიმროს წააგავს, ვიდრე ადგილს, სადაც ბავშვები თავისუფლად უნდა განვითარდნენ.
სკოლას თავისი ღია სივრცე აქვს, რომელიც ყვავილებისა და დეკორის ელემენტების საშუალებით, ზონებად არის დაყოფილი.
სასწავლო სივრცე უფრო დასასვენებელ ოთახებს ან მოდურ კაფეს წააგავს, სადაც სასწავლო პროცესი ურთიერთობაზეა დამყარებული.
ბავშვები სწავლის დროს, დავალებაზე ჯგუფებად მუშაობენ, თავისუფლად გადაადგილდებიან და ერთმანეთს ესაუბრებიან.
სკოლაში საკლასო დაფის ნაცვლად, პლანშეტი ან ნოუთბუკი გამოიყენება, რომელიც ყველა მოსწავლეს ინდივიდუალური აქვს. ყველა მოწყობილობა ერთიან სისტემასთან არის შეერთებული. მოსწავლის დასახმარებლად, მასწავლებელს მყისიერად შეუძლია ნებისმიერ სისტემაში შესვლა.
შენობის უზარმაზარი ფანჯრები ბავშვებს ეხმარება, თავი სამყაროს განუყოფელ ნაწილად იგრძნონ.
ამავე პრინციპით არის დაპროექტებული სპორტული მოედნები ყველა ასაკობრივი ჯგუფისთვის.
სკოლის შენობა აგებულია ეკოლოგიურად სუფთა მასალისგან.
ტერიტორიაზე სპეციალური ადგილებია გამოყოფილი სამშენებლო მასალისთვის, სადაც ბავშვებს შეუძლიათ, აგურებით ითამაშონ და მშენებლობის მიმართ ინტერესი გამოავლინონ.
აღსანიშნავია, რომ ბავშვებს, რომლებიც ამ სკოლაში სწავლობენ, სრულიად გაუქრათ ნევროზული და დეპრესიული სინდრომები. ყველა მოსწავლე წარმატებული და ბედნიერია.
ცნობისთვის, საერთაშორისო კვლევების თანახმად, ფინელი მოსწავლეები მსოფლიოში ცოდნის ყველაზე მაღალ დონეს აჩვენებენ. ისინი პლანეტის ყველაზე მკითხველი ბავშვები არიან. მსოფლიოში მეორე ადგილი უჭირავთ საბუნებისმეტყველო მეცნიერებებში და მეხუთე – მათემატიკაში.
პედაგოგიური საზოგადოების გაოცებას იწვევს ის ფაქტიც, რომ ფინეთში სასწავლო პროცესი დიდი ხანგრძლივობით არ გამოირჩევა.
ფინელი მოსწავლეების აკადემიურმა წარმატებამ მრავალი ქვეყნის მასწავლებელთა და განათლების სპეციალისტთა ყურადღება მიიპყრო. ისინი ყოველწლიურად აკვირდებიან და იკვლევენ, როგორ მოახერხა სახელმწიფომ, ჰქონდეს ასეთი განათლების სისტემა, ჰყავდეს ამდენი მაღალკვალიფიციური მასწავლებელი და სისტემატურად ზრუნავდეს მათ პროფესიულ განვითარებაზე.
საერთაშორისო გამოკვლევებით, ფინელი მოზარდები მსოფლიოს ყველაზე ჭკვიანთა რეიტინგში ლიდერობენ.