რობოტს შეუძლია, კოსმოსის შესახებ გიამბოთ და გამოიცნოს, როგორ ემოციებს განიცდის თანამოსაუბრე.
ინოპოლისის უნივერსიტეტის ინჟინერ-მკვლევარი ვადიმ რაუცკი ამბობს, რომ „გაგარინს“ ადამიანის თითქმის ყველა ემოციის ამოცნობა და გადმოცემა შეუძლია: სიხარული, ბრაზი, გაოცება, შიში, აბუჩად აგდება, ზიზღი და სევდა. ესმის რუსულ ენაზე საუბარი და ადვილად იმეორებს თანამოსაუბრის ქცევას.
იმისთვის რომ თანამოსაუბრის გაგება და მისთვის პასუხის გაცემა შეძლოს, რობოტი დინამიკებითა და მიკროფონით აღჭურვეს. თვალებში ჩამონტაჟებულია ვიდეოკამერები, ხოლო ემოციებს სახის კანის ქვეშ მოთავსებული 30 პატარა მოტორის საშუალებით გამოხატავს.
რობოტზე მუშაობა ჯერ არ დასრულებულა. ამჟამად ის მხოლოდ მოლაპარაკე და ძალიან ემოციური თავია. რობოტის ტანის ფუნქციას უკვე მზა ანდროიდი AR-601 შეასრულებს, რომელსაც ინოპოლისის ერთ-ერთი ლაბორატორიის თანამშრომლები სიარულს ასწავლიან.
რობოტის შემქმნელები ვარაუდობენ, რომ ზემოჩამოთვლილი ფუნქციების დახმარებით, ემოციური ანდროიდი შეძლებს, კარგი ექსკურსიამძღოლი, მაღაზიის კონსულტანტი, გამყიდველი ან მასწავლებელი გახდეს.
შეიძლება სულაც ახალი პროფესია ისწავლოს, რითაც ადამიანებს მომაბეზრებელი სამუშაოსგან გაათავისუფლებს და შემოქმედებითი თვალსაზრისით უფრო საინტერესო საქმის კეთების საშუალებას მისცემს.
ვადიმ რაუცკი ვარაუდობს, რომ 2017 წლის ბოლოსთვის რობოტი მთლიანად დასრულებული იქნება და ნებისმიერ მსურველთან გარკვეულ თემებზე საუბარს შეძლებს.
ჯერჯერობით უცნობია, როდის ჩაუშვებენ „გაგარინს“ წარმოებაში და როგორი იქნება მისი საცალო ფასი.