2013 წლის 18 მაისს powerball-მა 590 მილიონი დოლარის ჯეკპოტი გაათამაშა. გათამაშების გამარჯვებული ფლორიდის შტატის ქალაქ ზეფერჰილსში მცხოვრები 84 წლის პენსიონერი გლორია მაკკენზი გახდა.
გლორიას თქმით, ბედმა იმიტომ გაუღიმა, რომ ლატარიის ბილეთების რიგში მის წინ მდგარმა ქალმა თავისი ადგილი თავაზიანად დაუთმო.
18 მაისს გლორია მაკკენზი სახლიდან ლატარიის ბილეთის შესაძენად გავიდა. ადგილზე მისულმა აღმოაჩინა, რომ არც ერთ სალაროსთან თავისუფალი ადგილი არ იყო. შეწუხებული მოხუცი სალაროსთან მდგარმა ახალგაზრდა ქალმა მინდი კრენდელმა შენიშნა და თავისი ადგილი თავაზიანად დაუთმო.
კრენდელმა თავისი სიკეთის შედეგების სრულად გაცნობიერება საღამოს, ტელევიზორის ჩართვის შემდეგ შეძლო, როცა მისმა 10 წლის გოგონამ მელორიმ მოხუცი ქალბატონი იცნო.
ყველაფრის მიუხედავად, მინდლი კრენდელი სრულიადაც არ განიცდის, რომ უზარმაზარი ფული სრულიად უცხო ადამიანს დაუთმო და დღესაც მიაჩნია, რომ სჯობს თავაზიანი იყო, ვიდრე მდიდარი.
ლატარიის კომპანიის პრესმდივნის განცხადებით, 84 წლის გამარჯვებულმა 30 წლის განმავლობაში, ყოველწლიურად 19 მილიონი დოლარის მიღებას, ერთბაშად 370,8 მლნ დოლარის მიღება ამჯობინა.
რაც შეეხება უზარმაზარი მოგების განაწილებას, გლორიამ, დაახლოებით, 2 მილიონი დოლარი სკოლის სახურავის რემონტისთვის გაიღო, სადაც მისი ქალიშვილი ასწავლის, თავისი პატარა ბინა კი 1,2 მილიონ დოლარად ღირებული მშვენიერი სახლით შეცვალა.
უამრავი თხოვნის მიუხედავად, გლორიამ უარი თქვა პრესკონფერენციის ჩატარებაზე და მედიას მის ცხოვრებაში ჩარევისგან თავის შეკავება სთხოვა.
ასე რომ, საზოგადოებისთვის უცნობი დარჩა, როგორ დახარჯა ქალბატონმა დანარჩენი ფული.
ამერიკაში ლატარიების ისტორიაში ყველაზე დიდი ჯეკპოტი კი 2016 წლის 14 იანვარს გათამაშდა. Powerball-ის 1.58-მილიარდიანი საპრიზო ფონდი სამ იღბლიან მოთამაშეზე გადანაწილდა, რომელთაგან თითოეულმა 528 მილიონი დოლარი მიიღო.