იცით, რაში მდგომარეობს კალმის „ჭკუა“ და განსაკუთრებულობა? იმაში, რომ გრამატიკული შეცდომის შემთხვევაში მფლობელს აფრთხილებს და შეცდომის გამოსწორებისკენ მიუთითებს.
თავისი უნიკალური მონაცემების წყალობით, „ჭკვიანი კალამი“ ორთოგრაფიული შეცდომებისგან დაცვისა და მოზარდებისთვის მართლწერის სწავლების მშვენიერი საშუალებაა.
ახლა იმაზე, როგორ ახერხებს „ჯადოსნური კალამი“ ზემოჩამოთვლილი ფუნქციების განხორციელებას.
საქმე ის გახლავთ, რომ მის კორპუსში linux-ის ბაზაზე შექმნილი მინიატურული კომპიუტერია მოთავსებული. ამის გარდა, lernstift-ში ჩამონტაჟებულია სპეციალური სენსორი, რომელსაც შეუძლია ხელნაწერი ტექსტის წაკითხვა და ანალიზი.
„ჭკვიან კალამს“ ორი რეჟიმი აქვს - ორთოგრაფიისა და კალიგრაფიის. ორთოგრაფიის რეჟიმი მოწყობილობას საშუალებას აძლევს, ხელნაწერი ტექსტი წაიკითხოს და მართლწერა შეამოწმოს. შეცდომის აღმოჩენისას კალამი ვიბრაციას იწყებს და მფლობელს ანიშნებს, რომ რაღაც უნდა გაასწოროს. კალიგრაფიის რეჟიმში (რომელიც უფრო ბავშვებისთვისაა განკუთვნილი), კალამი ნაწერის კალიგრაფიას „აკვირდება“. თუ აღმოაჩინა, რომ ტექსტი რთულად იკითხება, კვლავ ვიბრაციის საშუალებით, მფლობელს შეცდომის შესახებ ამცნობს.
გარდა ამისა, ხელნაწერი ტექსტები ადვილად ინახება გამოსახულების სახით, რაც გაცილებით აადვილებს სხვადასხვა ელექტრონულ მოწყობილობებზე მათ გადაგზავნას კალამში დამონტაჟებული WI-FI-ს მეშვეობით.
lernstift-ის კალამს ნებისმიერ ზედაპირზე შეუძლია წერა და ეს გავლენას არ ახდენს მინიკომპიუტერის მიერ ტექსტის ანალიზზე.