დანიელმა პროფესორმა ბერიტ ჰეიტმანმა და მისმა კოლეგებმა დაასკვნეს, რომ ვიწრო თეძოები გულ-სისხლძარღვთა დაავადებების მაღალ რისკზე მეტყველებს.
ჰეიტმანის თქმით, ამის მიზეზი ბოლომდე გარკვეული არ არის, თუმცა არსებობს მონაცემები, რომ ვიწრო თეძოების მქონე ქალის ორგანიზმი ნაკლებ ინსულინს გამოიმუშავებს. ეს კი მხოლოდ დიაბეტის კი არა, გულ-სისხლძარღვთა დაავადებების რისკსაც ზრდის.
აღსანიშნავია, რომ ზედმეტად მსუქანი ქალებიც იმავე რისკ-ჯგუფში შედიან, რომელშიც მათი ტანწერწეტა და ვიწროთეძოიანი მეგობრები.
იაპონელმა და კანადელმა მკვლევარებმა დაადგინეს, რომ რამდენიმე ზედმეტი კილოგრამის მქონე ადამიანები იმაზე მეტს ცოცხლობენ, ვიდრე ძალიან გამხდრები ან მსუქნები და სიცოცხლის ხანგრძლივობით, ნორმალური წონის მქონე ადამიანებსაც კი უსწრებენ.
მაგალითად, ხანდაზმულობამდე მიღწევის შანსი გამხდრებს ნორმალური პროპორციების მქონე ადამიანებზე 70%-ით ნაკლები აქვთ, მსუქნებს კი - 35%-ით ნაკლები. მაგალითად, იაპონელები, რომლებსაც 40 წლის ასაკში რამდენიმე ზედმეტი კილოგრამი აქვთ, თავიანთ გამხდარ თანატოლებზე 5-6 წლით მეტს ცოცხლობენ.
ექიმებისა და ექსპერტების აზრით, ფეხმძიმე ქალს ცხიმის რაც უფრო დიდი მარაგი აქვს, მით მეტია ბავშვის გადარჩენისა და მისი მაღალი ინტელექტის შანსი. საქმე ის გახლავთ, რომ ცხიმოვანი უჯრედები მდიდარია ნივთიერებებით, რომლებიც ბავშვის განვითარებაში გადამწყვეტ როლს თამაშობს. ცხიმი ერთგვარი დეპოა ბავშვის ტვინისა და ნერვული სისტემის ფორმირებისთვის. ქალის თეძოსა და ფეხებზე არსებული ცხიმი მდიდარია დეკოზაჰექსაენური მჟავით, რომელიც ადამიანის ტვინის განსაკუთრებით მნიშვნელოვანი კომპონენტია.
ზემოთქმულის გათვალისწინებით, ისეთი შთაბეჭდილება რჩება, თითქოს ბუნებამ ქალის ორგანიზმში საგანგებოდ დააგროვა ცხიმები, რათა მომავალი თაობა ჯანმრთელი დაბადებულიყო.