1. მსოფლიოში ყველაზე ძლიერი ბებია დაღესტნელი ქალბატონი - 76 წლის საკინატ ხანაპიევა გახლავთ. საკინატ ბებიას შეუძლია, 50 მმ დიამეტრის მქონე რკინის ნაჭერი შიშველი ხელებით დაგრიხოს, მძიმე ჰანტელები ჰაერში ბურთებივით ათამაშოს, ლურსმნებჩარჭობილ ფიცრებზე დაიძინოს და სქელი რვეული ხელსახოცივით მსუბუქად გახიოს. სოლიდური ასაკის მიუხედავად, ქალბატონს შესანიშნავი მეხსიერება აქვს, უყვარს ლექსების კითხვა და თავადაც წერს. საკინატ ბებია მხოლოდ ფიზიკურად კი არა, სულიერადაც ძლიერი ქალი გახლავთ. ის არასოდეს ავადმყოფობს, არ სვამს წამლებს და ექიმის დახმარება არასოდეს დასჭირვებია. როგორც ყველა დაღესტნელი ქალი, საოჯახო მეურნეობას ეწევა და ბაღ-ბოსტანს უვლის. მას ცხრა შვილი ჰყავს, რომლებიც ქმრის ავადმყოფობის გამო, თითქმის მარტომ გაზარდა. მსოფლიოში უძლიერეს ბებიას შვილებიც გამორჩეული ჰყავს. მისი ერთი-ერთი ვაჟი ომარ ხანაპიევი ცნობილი ძალოსანია, რომელიც უძლიერესი ყბების წყალობით, „გინესის რეკორდების წიგნში“ მოხვდა. მას შეუძლია, კბილებით მატარებელი, თვითმფრინავი და გემი ადგილიდან დაძრას. მის ანგარიშზე 35 მსოფლიო რეკორდია.
2. „გინესის რეკორდების წიგნის“ თანახმად, ყველაზე ახალგაზრდა ბებია რუმინეთში მცხოვრები ბოშა ქალი რიფკა სტანესკუა, რომელმაც ბებიის სტატუსი 23 წლის ასაკში მიიღო. რიფკა 2 წლის იყო, როცა 5 წლის ბიჭუნაზე დანიშნეს, თუმცა 11 წლის ასაკში თავისი მომავალი ქმარი - 13 წლის იონელ სტანესკუ შეუყვარდა და მშობლების ნების საწინააღმდეგოდ, ცოლად გაჰყვა. ბოშათა კულტურაში ქალწულობას უდიდეს მნიშვნელობას აქცევენ, ამიტომ იონელთან ღამის გატარების შემდეგ ბავშვობისდროინდელი ნიშნობა ჩაიშალა. 12 წლის რიფკა უკვე გოგონას - მარიას დედა იყო. ერთი წლის შემდეგ რიფკას ვაჟიც შეეძინა. როგორც კი მარია წამოიზარდა, გადაწყვიტა, მაგალითი დედისგან აეღო. გოგონა 11 წლის ასაკში დაფეხმძიმდა და 12 წლისას ვაჟი შეეძინა. ნაადრევი ქორწინების გამო, რაც ბოშებში ჩვეულებრივი ამბავია, მარიას სკოლა არ დაუმთავრებია. ოჯახი ბოშათა დასახლებაში ცხოვრობს.
3. იმავე „გინესის რეკორდების წიგნის“ მიხედვით, პლანეტის ყველაზე ხანდაზმულ ბებიად ოფიციალურად აღიარებულია ფრანგი ქალბატონი ჟანა ლუიზა კალმანი, რომელიც 1997 წელს 122 წლის ასაკში გარდაიცვალა. იგი პირადად იცნობდა ვან გოგს და ორ მსოფლიო ომს მოესწრო.
4. რუსულ ფოლკლორულ ჯგუფს „ბურანოველი ბებიები“ თამამად შეიძლება ყველაზე ხანდაზმული ადამიანების მუსიკალური ჯგუფი ვუწოდოთ. ჯგუფმა, რომლის ყველაზე ხანდაზმული წევრი 78 წლისაა, რამდენიმე წლის წინათ ევროვიზიის მუსიკალურ კონკურსზე მეორე ადგილი დაიკავა.
5. მსოფლიოში ყველაზე ლამაზ ბებიად აღიარეს 47 წლის სერბი ქალბატონი ჟაკლინა. ქალს ერთი ქალიშვილი და ორი შვილიშვილი ჰყავს, თუმცა მოდის უკანასკნელ ტენდენციებს ფეხდაფეხ მიჰყვება და ამბობს, რომ მოდა ის ინსტრუმენტია, რომელიც მუდმივად ტონუსში ამყოფებს. მსოფლიოში ყველაზე ლამაზ ბებიას insagram-ზე საკუთარი ბლოგი და 165 000 ხელმომწერი ჰყავს, რომლებსაც მოდის ახალ ტენდენციებს აცნობს. ჟაკლინ ბებია დარწმუნებულია, რომ ქალს ასაკი კი არა, სტილი ალამაზებს.