დღეისთვის, მსოფლიოში ავტომობილიზაციის საშუალო მაჩვენებელი 1000 კაცზე 182 ავტომობილია. მათ შორის, ყველაზე მეტი - 264 მილიონი ამერიკის შეერთებულ შტატებში.
მსოფლიოს წამყვანი ქვეყნები, გზებსა და მაგისტრალებზე შექმნილი საცობების გამო, მთლიანი შიდა პროდუქტის 2%-დან 5%-მდე კარგავენ.
მაგალითად, საცობების გამო აშშ-ში იმდენი მილიარდი იკარგება, რამდენის ინვესტირებასაც გეგმავს ენერგეტიკაში არაბთა გაერთიანებული საამიროები მომავალი 33 წლის მანძილზე.
1980 წლის 16 თებერვალს პარიზი-ლიონის დამაკავშირებელ ავტომაგისტრალზე შექმნილი „საცობის“ სიგრძემ 176 კმ. შეადგინა. ეს ერთ მაგისტრალზე დარეგისტრირებული „საცობის“ რეკორდია, რომლის მიზეზი სამთო-სათხილამურო კურორტებიდან დაბრუნების პერიოდის და რთული მეტეოროლოგიური პირობების თანხვედრა გახდა.
2010 წელს ჩინეთში შექმნილი 100-კილომეტრიანი „საცობის“ ლიკვიდაციას 11 დღე დასჭირდა.
მეხიკოში, „პიკის საათებში“ გადაადგილებას ჩვეულებრივზე 66%-ით მეტი დრო სჭირდება. TomTom Traffic Index-ის მონაცემებით, მექსიკის დედაქალაქი ამ მაჩვენებლით მსოფლიოში პირველ ადგილზეა. მას მოჰყვება ბანგკოკი (61%) და ინდონეზიის დედაქალაქი ჯაკარტა (58%).
2016 წლის განმავლობაში, ლოს-ანჯელესელმა ავტომფლობელებმა საცობებში 104 საათი გაატარეს, რაც მსოფლიოში ყველაზე მაღალ მაჩვენებლად მიიჩნევა.
91 საათით მეორე ადგილზეა მოსკოვი. ყოველდღე რუსეთის დედაქალაქში საჭესთან 3,5 მლნ ადამიანი ჯდება. მოსკოველები საჭესთან ყოფნისას დროის მეოთხედზე მეტს საცობებში ატარებენ.
საგზაო საცობების დროს ავტომობილი საათში 1,8 ლ. ბენზინს წვავს. შესაბამისად, მოსკოველი ავტომფლობელი ყოველწლიურად საცობებში 163,8 ლიტრ საწვავს ხარჯავს.
ყოველწლიურად, მხოლოდ აშშ-ში, დიდ ბრიტანეთში, საფრანგეთსა და გერმანიაში საავტომობილო საცობების დროს, ატმოსფეროში 15,434 მლნ ტონა ნახშირორჟანგი გამოიყოფა.