რატომ ინახავდა პეტრე პირველი ცოლის საყვარლის მოჭრილ თავს?

უილიამი ბავშვი იყო, როცა მისი ოჯახი ვესტფალიიდან საცხოვრებლად რუსეთში გადავიდა.
უილიამის დები, მატრონა და ანა სასახლის კარის ცნობილი ქალბატონები და, ჭორებს თუ ვენდობით, პეტრეს საყვარლები იყვნენ.
უილიამი საომარი მოქმედებების დროს, იმპერატორს დაუახლოვდა და მისი ადიუტანტი გახდა. სამეფო კარზე მატრონა და ანა მონსების გავლენის წყალობით კი მალე იმპერატრიცა ეკატერინეს ხაზინადარობასაც გამოჰკრა ხელი. სამეფო კარზე ათწლიანი მოღვაწეობის პერიოდში, უილიამმა დიდი ქონების დაგროვება შეძლო და მოსკოვსა და სანკტ-პეტერბურგში რამდენიმე სახლი აიშენა.

1724 წელს უილიამ მონსი მოულოდნელად დააპატიმრეს. მას ბრალად სამეფო ფულის ფლანგვა და მექრთამეობა წაუყენეს, თუმცა რეალური მიზეზი სხვა გახლდათ. სამეფო კარის ჭორების თანახმად, პეტრე პირველმა უილიამი და საკუთარი ცოლი განმარტოებით, ერთობ საჩოთირო მდგომარეობაში აღმოაჩინა.

პეტრე პირველი, რომელიც თავად ცოლს „მარჯვნივ და მარცხნივ“ ღალატობდა, ცოლის ღალატმა საშინლად აღაშფოთა. მან უილიამს თავი მოჰკვეთა, სპირტით სავსე ქილაში ჩადო და მეუღლეს საძინებელში მიართვა.
ამის შემდეგ, პეტრე და ეკატერინე სუფრასთან ერთად აღარასოდეს დამსხდარან და სხვადასხვა ოთახში ეძინათ. იმპერატორმა ცოლს ღალატი მხოლოდ სიკვდილის წინ მიუტევა.

უილიამ მონსის თავი ეკატერინე პირველის საძინებლიდან პეტრეს კუნსტკამერაში გადაიტანეს, სადაც ნახევარი საუკუნე გაატარა, სანამ ამოიცნობდნენ და მიწას მიაბარებდნენ.